Xojeli rayonındaǵı «Turan» mádeniy dem alıw baǵınıń ashılıw saltanatı bolıp ótti.
Ilajda rayon hákimi Dáryabay Qaypov, 1-sanlı «Mehribanlıq úyi»niń direktorı Svetlana Son hám basqalar shıǵıp sóylep, húrmetli Prezidentimizdiń baslaması menen xalıqtıń mádeniy dem alısın shólkemlestiriw, mádeniyat hám dem alıw baǵlarınıń materiallıq–texnikalıq bazasın bekkemlew baǵdarında ámelge asırılıp atırǵan keń kólemli jumıslarǵa toqtap ótti.
Ózbekistan Respublikası Ministrler Kabinetiniń 2011- 2015-jıllarda mádeniyat hám dem alıw baǵlarınıń materiallıq-texnikalıq bazasın bekkemlew hám olardıń xızmetin bunnan bılay da jetilistiriw ilajları baǵdarlamasın tastıyıqlaw haqqında»ǵı qararınıń orınlanıwı támiyinlew, sonday-aq, Ózbekistan Respublikası Prezidenti Shavkat Mirziyoevtıń 2017-jıl 20-21-yanvar kúnleri respublikamızǵa saparı sheńberinde belsendiler menen ótkergen májilis protolına muwapıq respublikamızda 19 mádeniyat hám dem alıs orayın shólkemlestiriw belgilengen edi. Ótken dáwir ishinde bul baǵdarda keń kólemli jumıslar alıp barıldı.
Sonıń ishinde rayondaǵı «Turan» mádeniy dem alıw baǵına «Davlatnazar oromgohi» juwapkershiligi sheklengen jámiyeti tárepinen Qıtay Xalıq Respublikasınan 10 dana zamanagóy attrakcion alıp kelindi. Sonnan segizi paydalanıwǵa tapsırılǵan bolsa, qalǵan ekewi jaqın kúnlerde iske túsiriledi. Bul «Milliy bank»ten alınǵan 3 milliard 800 million sum jeńillikli kredit esabınan ámelge asırıldı. Nátiyjede 25 jańa jumıs ornı jaratıldı.
Usı kúni bárshe balalarǵa, sonıń ishinde «Mehribanlıq úyi»niń tárbiyalanıwshılarına, kem támiyinlengen járdemge mútáj shańaraqlardıń perzentlerine biypul xızmet kórsetildi. Rayonnıń kórkem óner sheberleriniń, «Tań juldızları» ansambli aǵzalarınıń qosıq hám ayaq oyınlarına jıynalǵanlarǵa ayrıqsha zawıq baǵıshladı.
Esletip ótemiz, «Davlatnazar oromgohi» juwapkershiligi sheklengen jámiyeti tárepinen paytaxtımızdaǵı Ámir Temur atındaǵı Beruniy rayonındaǵı Beruniy atındaǵı mádeniy dem alıw baǵlarına usınday aktrakcionlar alıp kelinip ornatılıp, búgingi kúni xalıqqa xızmet kórsetpekte.
Qaraqalpaqstan xabar agentligi.