Alıstaǵı Aral aydınları

Yaponiyanıń belgili basılımı – «Asahi Shimbun» gazetasınıń dóretiwshilik jámááti usı jıldıń 28-aprel – 6-may sáneleri aralıǵında Respublikamızda saparda boladı. Bul haqqında Qaraqalpaqstan Respublikası Ministrler Keńesiniń Málimleme xızmeti xabar bermekte.

Sapar etiwden maqset – Aral teńizi haqqında reportaj tayalaw, sonıń ishinde, teńiz qáddiniń ekologiyalıq jaǵdayın úyreniw, aymaqtaǵı mashqalalardı sheshiwde Yaponiya húkimeti menen xalıqaralıq birge islesiw, sonday-aq, donorlıq shólkemler menen ilimiy-akademiyalıq islesiw sheńberinde Yaponiya jámiyetshiliginiń dıqqat-itibarın usı mashqalalardı sheshiwge shaqırıw hámde keleshekte grant hám texnikalıq qarjılardı tartıwdı jolǵa qoyıw bolıp tabıladı.

Maǵlıwmat ornında: Yaponiyadaǵı eń iri úsh baslımnıń biri esaplanǵan «Asahi Shimbun» gazetası(1879-jıldan baslap shıǵa baslaǵan)na kelesi jılı 140 jıl toladı. Segiz million nusqada shıǵatuǵın gazeta óz betlerinde (http://www.asahi.com) Yaponiyanıń sonday-aq, dúnya elleriniń siyasat, ekonomikalıq, jámiyetlik hám mádeniy-gumanitarlıq tarawlarınan materiallar járiyalap baradı.

Esletip ótemiz, jaqında Ullıbritaniyanıń jáhánge belgili BBC teleradiokorporaciyasınıń dúnyajúzilik xızmeti dóretiwshilik jámááti de Aral mashqalası tuwralı qısqa metrajlı filmdi súwretke alǵan edi.

QXA