Rayon hákimligi rásmiy veb–saytınıń bergen maǵlıwmatına qaraǵanda, rayondaǵı «Beskópir» hám «Bostan» awıl puqaralar jıyınları aymaǵında «Abat awıl» baǵdarlaması tiykarında qurılıs hám abadanlastırıw jumısların alıp barıw belgilengen.


«Beskópir» awıl puqaralar jıyınında 756 xojalıqta 4968 adam jasaydı. Aymaqta «Agro biznes Qonlikwl» JShJ tárepinen 28 mıńbas tawıq baǵılatuǵın qusshılıq firmasın qurıw rejelestirilgen bolıp, bul jerde 15 jańa jumıs ornın jaratıw názerde tutılǵan. Sonday–aq, «Ásembaǵ» jeke kárxanası tárepinen mámleketlik sheriklik tiykarında 50 orınlıq jeke menshik mektepke shekemgi bilimlendiriw mákemesi qurıladı. Aymaqtaǵı 13-sanlı ulıwma bilim beriw mektebinde kapital ońlaw, 2 kilometrlik piyadalar jolın ońlaw, 30 dana kóshe shıraqların ornatıw, 0,06 gektarlıq jer maydanın gúlzarlıqqa aylandırıw, 2,1 kilometrlik magistral suw tarmaqların rekonstrukciyalaw, 2 dana transformatordı qaytadan ornatıw hám 0,39 kilometrlik ishki jollardı ońlaw jumısları baslap jiberildi.


Rayondaǵı «Bostan» awıl puqaralar jıyınında 543 xojalıqta 3268 adam jasaydı. Aymaqta «Sadıqov Sabırjan» fermer xojalıǵı tárepinen 500 bas násilli qaramal alıp kelip, kóbeytiw esabınan xalıqtıń gósh hám sút ónimlerine bolǵan talabın turaqlı túrde támiyinlew rejelestirilgen bolıp, bul arqalı 20 jańa jumıs ornın ashıw názerde tutılǵan. Sonday–aq, aymaqtaǵı 8-sanlı ulıwma bilimberiw mektebinde hám 12-sanlı mektepke shekemgi bilimlendiriw mákemesinde kapital rekonstrukciyalaw, 0,7 kilometrlik piyadalar jolın ońlaw, 20 dana kóshe shıraqların ornatıw,0,06 gektarlıq jer maydanın gúlzarlıqqa aylandırıw, 2 kilometrlik magistral suw tarmaqların, 2 kilometrlik kóshe tarmaqların rekonsturkciyalaw jáne 1,15 kilometrlikishki jollardı ońlaw jumısları alıp barılmaqta.

Qaraqalpaqstan xabar agentligi