Nókis qalası hákimliginde Qaraqalpaqstan Respublikası Jınayat isleri boyınsha Joqarǵı sudınıń sudyası lawazımına talaban Gúlnara Bazarbaevanı keń jámiyetshilikke tanıstırıwǵa baǵıshlanǵan májilis bolıp ótti.

Qaraqalpaqstan Respublikası Joqarǵı Keńesiniń komitet baslıǵı S.Turmanov basqarıp barǵan ilajǵa qala hám rayon hákimlikleri, Xalıq qabıllawxanaları, bilimlendiriw mákemeleriniń, jámiyetlik shólkemlerdiń hám ǵalaba xabar qurallarınıń wákilleri qatnastı.

Kún tártibindegi másele boyınsha Ózbekistan Respublikası Sudyalar Joqarǵı keńesiniń aǵzası Raxat Ismaylov shıǵıp sóylep, elimizde huqıqıy demokratiyalıq mámleket, puqaralıq jámiyet qurıwda nızam ústinligin támiyinlew baǵdarında ámelge asırılıp atırǵan keń kólemli ilajlarǵa toqtap ótti hám jıynalǵanlardı talabannıń ómiri jáne miynet jolı menen tanıstırdı.

Atap ótilgenindey, 2017-2021-jıllarda Ózbekistan Respublikasın rawajlandırıwdıń bes tiykarǵı baǵdarı boyınsha Háreketler strategiyasında puqaralardıń ádil sudlawǵa erisiw dárejesin arttırıw, sud hákimiyatınıń haqıyqıy erkinligin támiyinlew, insannıń huqıqları menen erkinliklerin qorǵawdıń kepilliklerin kúsheytiw sud-huqıq salasındaǵı reformalardıń tiykarǵı baǵdarları etip belgilendi. Usı jıl 13-iyun kúni Tashkent qalasında bolıp ótken sud uyımları sistemasında ádil sudlawdı támiyinlew baǵdarındaǵı jumıslardıń jaǵdayı, mashqalalar hám keleshektegi wazıypalarǵa baǵıshlanǵan videoselektor májilisinde húrmetli Prezidentimizdiń atap ótkenindey, bunnan keyin sudyalardıń jumısına, birinshi gezekte, xalıqtıń ózi baha beredi. Sonıń menen birge, sudyalardıń joqarǵı keńesine sudyalıq lawazımlarına maman qánigeler arasınan ashıq-aydın hám anıq tańlaw tiykarında sudyalar korpusın qáliplestiriw, talabanlardıń hám sudyalardıń kásipke tayarlıǵın shólkemlestiriw, xalıq penen pikirlesiwdi jolǵa qoyıw wazıypaları júklengen.

Ilajda Nókis qalalıq «Nuraniy» qorınıń baslıǵı Karamatdin Qalenderov, Nókis medicina kolledji direktorınıń orınbasarı Zıyada Bekmanova, Ózbekstan jaslar awqamı Nókis qalalıq keńesiniń baslıǵı Aziz Pirjanov, paytaxtımızdaǵı 44-sanlı ulıwma bilim beriw mektebiniń muǵallimi Mamura Atajanova talabandı qollap-quwatlaytuǵının bildirdi.

-Joqarıda atap ótilgen videoselektr májilisinde húrmetli Prezidentimizdiń sudyalar hár bir insan táǵdirin sheshkende sanasında ádillik, tilinde haqıyqat, qálbinde páklik bolıwı tiyis, degen pikirin hár bir sudya júreginde saqlawı kerek,- deydi sudyalıq lawazımına talaban Gúlnara Bazarbaeva.-Solay eken, egerde meni usı mártebeli hám juwapkerli lawazımǵa ılayıq dep tapsa, bar bilim jáne tájiriybemdi sudlardıń shın mánisindegi «Ádillik qorǵanı»na aylanıwına, puqaralardıń huqıqları menen erkinliklerin isenimli qorǵawǵa, tarawǵa jetik qánigeler tayarlawǵa jumsayman dep, isendiremen. Ózbekistan Respublikası Prezidentiniń 2017-jıl 21-fevraldaǵı «Ózbekistan Respublikası sud sisteması strukturasın túp-tiykarınan jetilistiriw hám jumıs nátiyjeliligin arttırıw ilajları haqqında»ǵı Pármanı sud hákimiyatınıń shın mánisindegi biyǵárezligin támiyinlew, sudlar iskerliginiń nátiyjeliligin hám abıroyın arttırıw, sudlardıń dúzilisi jáne sudyalıq lawazımına talabanlardı tańlaw hám tayınlaw sistemasın bunnan bılay da jetilistiriwge xızmet etpekte.

D.ABIBULLAEV,

Qaraqalpaqstan xabar agentliginiń xabarshısı.