Húrmetli kórgizbe qatnasıwshıları!
Túrkmenstannıń jetekshi kárxanaları, kompaniyalarınıń hám shólkemleriniń basshıları!
Qádirli doslar!
Túrkmenstan Prezidenti húrmetli Gurbanguli Myalikgulievich Berdimuxamedovtıń Ózbekstan Respublikasına mámleketlik saparı sheńberinde Tashkentte ótkerilip atırǵan Túrkmenstan milliy kórgizbesiniń barlıq qatnasıwshıların hám miymanların úlken qanaatlanıwshılıq penen shın júrekten qutlıqlayman.
Ózbekstan hám Túrkmenstan strategiyalıq sherik bolıp tabıladı. Biziń xalıqlarımızdı kóp ásirlik jaqın qońsıshılıq baylanısları, ulıwma tariyx, din hám til, mádeniyat, úrp-ádet hám dástúrlerdiń uqsaslıǵı bekkem baylanıstırıp keledi.
Ózbekstan hám Túrkmenstan arasındaǵı kóp qırlı birge islesiw qatań siyasiy erk-ıqrar jáne joqarı dárejedegi nátiyjeli ushırasıwlar dawamında erisilgen kelisimlerdi birgelikte ámelge asırıp atırǵanımızdıń nátiyjesinde izbe-iz rawajlanıp, anıq mazmun menen bayıp barmaqta.
Óz-ara birge islesiwimizdiń baslı baǵdarın sawda-ekonomikalıq taraw quraytuǵınına gúman joq. Ótken qısqa dáwirde biz bul baǵdarda haqıyqatında da ayrıqsha áhmiyetke iye nátiyjelerge eristik.
Sońǵı jılları birinshi márte óz-ara sawda kólemi jedel pátler menen artıp barmaqta. Ellerimiz kárxanaları hám shólkemleri arasında ekonomikanıń dástúriy túrde birin-biri tolıqtıratuǵın tarmaqlarında kooperaciyalıq baylanıslar kúsheymekte.
Usı jerde bárinen burın janılǵı-energetika kompleksi, awıl xojalıǵı, mashina qurılısı, temir jol transportın modernizaciyalaw hám basqa da kóplegen tarawlardaǵı joybarlar haqqında sóz bolmaqta.
Biz transport kommunikaciyaların rawajlandırıw jáne mámleketlerimizdiń hám pútkil regionımızdıń úlken tranzit potencialın nátiyjeli iske qosıwǵa qaratılǵan óz-ara paydalı birge islesiwdi keńeytpektemiz.
Búgingi kúnde ellerimizdiń biznes toparları arasındaǵı izbe-iz isbilermenlik baylanısları jáne aymaqlararalıq bekkemlenip atırǵan birge islesiw sheńberinde keń perspektivalar ashılıp atırǵanın atap ótiw kerek.
Húrmetli doslar!
Bunnan bir ay burın Ashxabadta Túrkmenstan Prezidentiniń tikkeley qollap-quwatlawı menen Ózbekstan milliy sanaat kórgizbesi tabıslı ótkerilip, ol túrkmenstanlı sheriklerimizde úlken qızıǵıwshılıq oyatqan edi.
Búgin biz elimizdiń tek ǵana isbilermen toparları emes, al pútkil jámiyetshiliktiń dıqqat orayında turǵan Túrkmenstan milliy kórgizbesin ashpaqtamız.
Kórgizbe kompleksinde búgingi Túrkmenstan ekonomikasınıń úlken potencialı hám joqarı itibarǵa ılayıq jetiskenlikleri, onıń bay tábiyǵıy, ilimiy hám intellektuallıq resursları, zamanagóy texnologiyaları keńnen kórsetilmekte.
Sonıń menen birge, bul jerde shólkemlestirilgen ayqın ekspoziciya tuwısqan túrkmen xalqınıń áyyemgi hám biybaha mádeniyatı jáne dástúrleri menen jaqınnan tanısıw imkaniyatın beredi.
Túrkmenstannıń xalıqaralıq kólemde tán alınǵan barlıq jetiskenlikleri húrmetli Gurbanguli Myalikgulievich Berdimuxamedovtıń tereń oylanǵan, jemisli siyasatınıń nátiyjesi ekenin ayrıqsha atap ótiwdi qáler edim.
Qádirli kórgizbe qatnasıwshıları hám miymanlar!
Sizlerdi eki tárepleme qatnasıqlarımızdaǵı qutlı waqıya – Ózbekstan paytaxtında Túrkmenstan milliy kórgizbesiniń ashılıwı menen jáne bir márte shın júrekten qutlıqlayman.
Kórgizbe juwmaǵında ekonomikanıń túrli tarmaqlarında kooperaciyalıq baylanıslardı rawajlandırıwǵa, ellerimiz arasındaǵı óz-ara paydalı birge islesiwdi dos xalıqlarımızdıń abadanlıǵı jolında jáne de bekkemlewge xızmet etetuǵın perspektivalı joybarlardı ámelge asırıw boyınsha jańa sawda shártnamalarına hám kelisimlerge qol qoyılatuǵınına bekkem isenemen.
Bársheńizge kórgizbede nátiyjeli jumıs alıp barıwdı, tabıslı sóylesiwler ótkeriwdi tileymen.
Miymandos Ózbekstan jerine xosh keldińiz!
Shavkat MIRZIYoEV,
Ózbekstan Respublikası Prezidenti