Húrmetli doslar!
Xanımlar hám mırzalar!
Bárinen burın, sizlerdi Qandım gazdi qayta islew kompleksi qurılısı juwmaqlanǵanı hám onıń iske túsiriliwi múnásibeti menen ótkerilip atırǵan búgingi saltanatlı máresimde qutlıqlap, usı úlken waqıya menen shın júrekten qutlıqlawǵa ruqsat etkeysiz.
Birinshi gezekte Rossiya Federaciyası Prezidenti húrmetli Vladimir Vladimirovich Putinge Ózbekstan hám Rossiya arasındaǵı strategiyalıq sheriklik hám awqamlaslıq qatnasıqlardı keńeytiw jáne bekkemlew máselelerine turaqlı áhmiyet berip, úlken itibar qaratıp atırǵanı ushın minnetdarshılıq bildiremen.
Áne usınday áhmiyetli qollap-quwatlaw sebepli bunday keń kólemli joybar tek ǵana eki jılda ámelge asırıldı.
Qandım kompleksiniń iske túsiriliwi, álbette, xalıqlarımızdıń abadanlıǵına hám Ózbekstannıń sociallıq-ekonomikalıq rawajlanıwına xızmet eteuǵının ayrıqsha atap ótiwdi qáler edim.
Búgingi imkaniyattan paydalanıp, Rossiya Federaciyası Húkimetine hám Rossiya Federaciyası energetika ministri mırza Aleksandr Valentinovich Novakqa, «Lukoyl» kompaniyası basqarmasınıń baslıǵı mırza Vagit Yusufovich Alekperovqa, «Xunday Injiniring» kompaniyasınıń prezidenti mırza Song Sang Rokqa, Rossiya Federaciyası hám Koreya Respublikasınıń Ózbekstan Respublikasındaǵı elshilerine hám basqa da sheriklerimizge, elimizdiń jáne shet el ǵalaba xabar qurallarınıń wákillerine biz ushın oǵada úlken áhmiyetke iye bolǵan usı ilajda qatnasıp atırǵanı ushın ózimniń minnetdarshılıǵımdı bildiremen.
Qádirli miymanlar!
Biz Ózbekstanda qabıl etilgen Háreketler strategiyasınıń nátiyjeli hám keń kólemde ámelge asırılıp atırǵanı sanaattıń jetekshi tarmaqların jedel rawajlandırıwǵa xızmet etpekte.
Elimizge tikkeley shet el investiciyalarınıń aǵımı kóbeymekte, shet elli sherikler menen barlıq tarmaqlar, sonıń ishinde, janılǵı-energetika kompleksi boyınsha óz-ara paydalı birge islesiwimiz keńeymekte.
Ózbekstanda innovaciyalıq ekonomikanı qáliplestiriw boyınsha sapa jaǵınan jańa basqıshta ámelge asırılıp atırǵan strukturalıq reformalar sheńberinde biz neft-gaz sanaatın rawajlandırıwǵa ayrıqsha itibar qaratıp atırmız.
Búgingi kúnde tarmaqta ámeldegi aktivlerdiń nátiyjeliligin arttırıw, joqarı texnologiyalarǵa tiykarlanǵan qúdiretli óndiris bazasın jaratıw, uglevodorod shiyki zatın qazıp alıw kólemin kóbeytiw, onı tereń qayta islew tiykarında joqarı qosımsha qunǵa iye bolǵan jańa túrdegi tayar ónimlerdi islep shıǵarıwǵa hám olardıń eksportın shólkemlestiriwge qaratılǵan siyasat izbe-iz ámelge asırılmaqta.
Úlken kólemdegi investiciya portfeli hám bay shiyki zat bazası bizge, eń aldınǵı bilimlerdi hám oǵada nátiyjeli texnologiyalardı engiziwge ayrıqsha áhmiyet qaratqan halda, tarawdı kompleksli rawajlandırıwǵa ótiw imkaniyatın berdi.
Húrmetli doslar!
Biz Ózbekstanda óz-ara isenim hám qollap-quwatlaw, eki tárep ushın da paydalı jáne ulıwma máplerdi esapqa alıw principleri tiykarında qáliplesken Ózbekstan hám Rossiya arasındaǵı strategiyalıq sheriklik hám awqamlaslıq qatnasıqlardı joqarı bahalaymız jáne qádirleymiz.
Biziń joqarı dárejedegi ushırasıwlarımızdıń nátiyjesinde erisilgen kelisimler ellerimizdiń kóp qırlı ámeliy birge islesiwin jáne de rawajlandırıw ushın oǵada keń múmkinshilikler jarattı hám onı jańa basqıshqa kóterdi.
Rossiya biziń sawda hám investiciya tarawındaǵı eń iri dástúriy birge islesiwshilerimiz bolıp tabıladı. Házirgi kúnde óz-ara sawda kólemi úzliksiz artıp barmaqta, birgelikte úlken áhmiyetke iye investiciyalıq baǵdarlamalar menen joybarlar ámelge asırılmaqta.
Rossiyanıń jetekshi energetika kompaniyaları hám bankleri menen sheriklikte birge islesiwmizdiń lokomotivine aylanǵan neft-gaz tarawında úlken joybarlardı ámelge asırıp atırmız.
Tábiyǵıy gaz hám neft jetkerip beriw boyınsha kelisimler tabıslı orınlanbaqta, joqarı maman qánigeler tayarlaw baǵdarında óz-ara nátiyjeli birge islesiw jolǵa qoyılǵan.
Biziń waqıt hám turmıs sınaǵınan ótken tiykarǵı, strategiyalıq sherigimiz – energetika tarawında dúnyada jetekshi orındı iyeleytuǵın «Lukoyl» kompaniyası bolıp tabıladı.
Biz kóp jıllardan berli nátiyjeli birge islesip kiyatırmız. Qandım toparına kiretuǵın kánler, Xavuzak hám Shodi, Qubla-batıs Xisor kánlerin qazıw hám ózlestiriw boyınsha joybarlardı birgelikte ámelge asırǵanımız bunıń ayqın mısalı bolıp esaplanadı.
Ótken ayda Ózbekstanda «Lukoyl» kompaniyasınıń birinshi janılǵı quyıw shaqapshası iske túsirildi.
Ol biziń sherikligimiz nátiyjesiniń ayqın mısalı bolıp, Ózbekstan hám Rossiya arasındaǵı hár tárepleme birge islesiwdiń tabıslı rawajlanıwına xızmet etetuǵının ayrıqsha atap ótpekshimen.
Biziń birgeliktegi is-háreketlerimiz bárinen burın elimizdiń tábiyǵıy baylıqlarınan aqılǵa uǵras hám nátiyjeli paydalanıwǵa, joqarı texnologiyalarǵa tiykarlanǵan hám eksportqa baǵdarlanǵan óndiris kárxanaların iske túsiriwge jáne jańa jumıs orınların jaratıwǵa qaratılǵan.
Húrmetli ilaj qatnasıwshıları!
Bunnan sarras eki jıl burın 19-aprel kúni biz siz benen usı obekttiń tırnaǵın qoyıwǵa baǵıshlanǵan máresimde qatnasıp, bul joybar qurılısınıń baslanıwına start bergen edik.
Birgeliktegi is-háeketlerimiz hám qánigelerdiń joqarı sheberligi sebepli Oraylıq Aziyadaǵı eń iri qurılmalardan biri bolǵan bul kompleks qısqa múddette qurıp pitkerildi.
Ózlestirilgen investiciyalardıń kólemi 3 milliard dollardan asqanın ayrıqsha atap ótpekshimen.
Qurılıs «Xunday Injiniring», «Posko» hám «Dji-Es», «Enter Injiniring» sıyaqlı dúnyaǵa belgili kompaniyalar menen birgelikte ámelge asırıldı. Onda «BASF», «Yakobs», «Xanivell» hám basqa da kóplegen shet el jetekshi kompaniyalarınıń alınǵı texnologiyaları, ilimiy qollanbaları engizildi. Bul qurılısqa joqarı maman shet el qánigeleri de tartıldı.
Sizlerdiń bársheńizge usı keń kólemli joybardı tabıslı ámelge asırıwǵa qosqan úlesińiz ushın shın júrekten minnetdarshılıq bildirmekshimen.
Bul joybardıń áhmiyeti biybaha ekenin atap ótiw orınlı.
Komplekstiń paydalanıwǵa tapsırılıwı jılına 8 milliard kub metrden aslam tábiyǵıy gaz qazıp alıw hám onı qayta islew, tazalanǵan tovarǵa qolaylı gaz hám 130 mıń tonnadan zıyat turaqlı gaz kondensatın alıw imkaniyatın beredi.
Eń áhmiyetlisi, 2 mıńnan aslam jańa jumıs orınları, zamanagóy sociallıq infrastruktura tarmaqları jaratıldı.
Bul baǵdarda kompleks qurılısında qatnasqan mıńlaǵan jas qánigeler aldınǵı texnologiyalıq sheshimler hám joqarı xalıqaralıq sapa standartları tiykarında eń iri óndiris obektlerin jedel qurıw boyınsha zamanagóy usıllardı ózlestirgeni, bul jerde arttırǵan kónlikpeleri menen tájiriybesin keleshekte elimizde jańa joybarlardı ámelge asırıwda qollanıw imkaniyatına iye bolǵanı úlken áhmiyetke iye bolıp tabıladı.
Húrmetli miymanlar hám máresim qatnasıwshıları!
Pursattan paydalanıp, biziń doslarımızǵa hám sheriklerimizge, kóp sanlı qánigelerge, injener hám qurılısshılarǵa, óziniń pidákerlik miyneti hám kásiplik sheberligi menen usı zamanagóy sanaat kompleksin qurıwǵa úles qosqan barlıq insanlarǵa jáne bir márte ózimniń shın júrekten minnetdarshılıǵımdı bildiremen.
Álbette, búgin iske túsirilip atırǵan, óziniń kólemi hám texnologiyaları boyınsha biybaha bolǵan Qandım gazdi qayta islew kompleksi biziń barǵan sayın bekkemlenip atırǵan birge islesiwimizdiń hám sherikligimizdiń jáne bir tımsalına aylanadı, elimizdiń jedel sociallıq-ekonomikalıq rawajlanıwına xızmet etedi.
Itibarıńız ushın raxmet.