«Isbilermenlik xızmeti tarawındaǵı licenziyalaw hám ruqsat beriw tártip-qaǵıydaların jáne de qısqartıw hám ápiwayılastırıw, sonday-aq, biznes júrgiziw sharayatların jaqsılaw ilajları haqqında»ǵı Prezident pármanı qabıl etildi. Bul haqqında Ádillik ministrliginiń «Huquqiy axborot» kanalı arqalı málim etildi, dep jazadı Daryo.uz.
Mámleketlik siyasattıń belgilenip atırǵan áhmiyetli ústinlikleri hám tiykarǵı wazıypalarınan kelip shıǵıp, huqıqtı qollaw ámeliyatın, milliy nızamshılıq hám shet ellerdiń nızamshılıǵın analizlew tiykarında, usı hújjet arqalı 42 túrdegi licenziyalaw hám ruqsat beriw tártip-qaǵıydaların biykar etiw názerde tutılmaqta. Olardıń arasında – neft ónimlerin avtomobillerge janar may quyıw shaqapshaları hám may almastırıw punktleri arqalı satıwdı licenziyalaw, bajıxana brokeri sıpatında jumıs alıp barıwǵa ruqsat beriw, sırtqı reklamanı jaylastırıwǵa ruqsatnama hám basqalardı sanap ótiw múmkin.
Isbilermenlik jumısınıń ayırım tarawlarında birneshe túrdegi licenziyalardı hám ruqsat beriw formasındaǵı hújjetlerdi alıw talap etilip, bul isbilermenlik subektleri ushın artıqsha áweregershilik hám finanslıq qárejetlerdi arttıradı. Licenziyalar hám ruqsat beriw formasındaǵı hújjetlerdi alıw mexanizmin ápiwayılastırıw maqsetinde, sonday-aq, 38 túrdegi licenziyalanatuǵın jumıs túrlerin jáne ruqsat beriw tártip-qaǵıydaların 17 túrge birlestiriw názerde tutılmaqta.
Byurokratiyalıq tosqınlıqlardı alıp taslaw, isbilermenlik subektleriniń múrájatların jedel túrde kórip shıǵılıwın támiyinlew maqsetinde isbilermenlik jumısı tarawındaǵı 25 túrdegi licenziyalar hám ruqsat beriw formasındaǵı hújjetlerdi rásmiylestiriw múddetleri ishki rásmiylestiriw tártip-qaǵıydaların muwapıqlastırıwdıń esesine qısqartılmaqta, sonday-aq, 9 túrdegi jumıstı licenziyalaw tártibi licenziyalaw boyınsha funkciyalardı Ózbekstan Respublikası Ministrler Kabinetinen tiyisli mámleketlik organlarına tapsırıw jolı arqalı ápiwayılastırılmaqta. Sonıń menen birge, 5 túrdegi licenziyalar hám ruqsat beriw uqıplılıǵına iye bolǵan hújjetlerdi beriw funkciyaları respublikalıq mámleketlik basqarıw organlarınan olardıń aymaqlıq basqarmalarına jáne jergilikli mámleketlik hákimiyat organlarına ótkerilmekte.
Sonday-aq, pármanda isbilermenlik jumısı tarawındaǵı 19 túrdegi licenziyalardı hám ruqsat beriw formasındaǵı hújjetlerdi alıw tártip-qaǵıydaların jáne de qısqartıw hám ápiwayılastırıwǵa qaratılǵan ilajlar nazerde tutılǵan. Máselen 2018-jıldıń 1-iyunınan:
– telekommunikaciya tarmaqların qarjılandırıw, qurıw, paydalanıw hám xızmet kórsetiw, qımbat bahalı qaǵazlar bazarında professional jumıslardı ámelge asırıw, bahalaw, veterinariya hám turizm xızmetin ámelge asırıw ushın licenziya hám ruqsat beriw uqıplılıǵına iye bolǵan hújjetlerdi alıwda usınılatuǵın hújjetlerdiń sanı qısqartılmaqta;
– rieltorlıq shólkemler ushın ustav kapitalınıń májbúriy muǵdarına salıstırǵanda qoyılatuǵın licenziyalıq talaplar biykar etilmekte, aldın ala tólem almaǵan halda rieltorlıq xızmetlerin kórsetiw imkaniyatı berilmekte;
– jeńil avtomobillerge iye bolǵan fizikalıq shaxslarǵa jeke tártiptegi isbilermenlik formasında jónelisli taksi sıpatında jolawshılardı kommerciyalıq tártipte tasıw huqıqı berilmekte;
– kóshpeli sawdanı ámelge asırıwǵa ruqsatnama jeke tártiptegi isbilermenlerge de, ruqsatnamanıń ámel etiw múddetin on eki aydan kóp bolmaǵan múddetke beriw huqıqı berilmekte, bir ruqsatnama menen birneshe jerde kóshpeli sawdanı ámelge asırıwǵa ruqsat berilmekte.
Qaraqalpaqstan xabar agentligi