Ashxabad qalasında 29-31-mart kúnleri «Made in Uzbekistan» Milliy sanaat kórgizbesi bolıp ótti. Onda túrkmenstanlı isbilermenler Ózbekstan ónimlerine úlken qızıǵıwshılıq bildirdi.

Eki mámleket basshılarınıń joqarı dárejedegi ushırasıwı waqtında erisilgen jańa basqıshtaǵı birge islesiw baylanısları óz-ara húrmet hám isenim ruwxında bekkemlenip barmaqta. Bul, ásirese, siyasiy, sawda-ekonomikalıq, transport-kommunikaciyalıq hám mádeniy-gumanitarlıq tarawlarda sezilerli dárejede jedellesti.

Prezidentimiz Shavkat Mirziyoevtiń 2017-jıl mart ayında Túrkmenstanǵa mámleketlik saparı dawamında qol qoyılǵan Strategiyalıq sheriklik haqqındaǵı shártnama tiykarında bul el menen sawda, óndiris kooperaciyası, energetika, transport, awıl xojalıǵı hám basqa da tarawlarda iri joybarlar ámelge asırılmaqta.

Ózbekstan hám Túrkmenstan sawda-sanaat palatalarınıń birge islesiwinde joqarı dárejede shólkemlestirilgen bul forum, áne, usı doslıq baylanıslardıń logikalıq dawamı boldı. Bul ilaj qońsılas mámleket isbilermen toparları wákilleri menen sawda-ekonomikalıq birge islesiwdi bunnan bılay da rawajlandırıw, tıǵız sheriklik baylanısların bekkemlewde úlken áhmiyetke iye. Onda elimizdiń barlıq aymaqlarınan 100 den aslam iri sanaat kárxanası hám isbilermenler óz ónimleri menen qatnastı.

Ózbekstannıń taw-kán, metallurgiya, neft-gaz, mashina qurılısı, elektroenergetika, toqımashılıq, ximiya sanaatı, qurılıs materialları, turmıslıq texnika, azıq-awqat, medicina ónimleri, avtomobil qurılısı, qamsızlandırıw xızmetleri, ámeliy kórkem óner hám ónermentshilik ónimleriniń kórgizbesi ózine tánligi hám biytákirarlıǵı menen ajıralıp turdı.

Kórgizbede kommerciyalıq-sheriklikti, paydalı birge islesiwdi bekkemlewge qaratılǵan shártnamalarǵa qol qoyıldı, ónimler eksporttın keńeytiw baǵdarında perspektivalı kelisimlerge erisildi.

ÓzA