Nókis sport kolledjinde qalalıq Bántlikke kómeklesiw orayı tárepinen «Miynet yarmarkası» ótkerildi.

Oǵan paytaxtımızdaǵı 84 kárxana hám mákeme 539 bos jumıs ornı menen qatnastı. Olardıń 187 si joqarı, 352 si joqarı maǵlıwmatlılar ushın arnalǵan.

– Usı jıl 15-fevral kúni bos jumıs orınları hám vakant lawazımları miynet yarmarkasında 94 kárxana hám mákeme 469 bos jumıs orınları menen qatnasıp, 67 puqara jumıs penen támiyinlengen edi. Sonday-aq, 187 puqara jámiyetlik, 183 puqara abadanlastırıw, 3 puqara qurılıs, 1 puqara mayıplıǵı bolǵan adamlarǵa qaraw boyınsha jumıslarǵa tartıldı.

Búgingi ilaj Ózbekstan Respublikası Prezidentiniń 2017-jıl 24-maydaǵı «Bántlik tarawında mámleketlik siyasattı bunnan bılay da jetilistiriw hám miynet uyımları jumıslarınıń nátiyjeliligin túp-tiykarınan arttırıw ilajları haqqında»ǵı PF-5052-sanlı pármanı hám 7-dekabrdegi R-5135-canlı qararı tiykarında Qurallı Kúshler rezervinen bosatılǵan puqaralardı, oladıń shańaraq aǵzaların jumıs penen támiyinlew maqsetinde ótkerildi.

Bul ilajǵa áskeriy xızmetten bosap kelgen jámi 106 puqara hám bir qatar jaslar qatnaspaqta,-deydi Nókis qalalıq Bántlikke kómeklesiw orayınıń direktorı S.Urazaliev.

Sonday-aq, ilajda Sırtqı miynet migraciyası máseleleri agentliginiń wákilleri de qatnasıp, puqaralardıń jumıs boyınsha múrájatların tıńladı.

Yarmarkada 74 puqara jumısqa kiriw boyınsha jollama aldı.

Qaraqalpaqstan xabar agentligi.