Ulıwma xalıqlıq Nawrız bayramı saltanatları kúninde Taqıyatas rayonı orayında “Atiyaj-Gulzar” juwapkershiligi sheklengen jámiyetiniń dándi qayta islew kárxanası paydalanıwǵa tapsırıldı.
Bul kárxanaǵa Turkiyanıń “Or-Tas” firmasınıń ulıwmalıq bahası 1 million 50 mıń AQSh dolları bolǵan zamanagóy úskeneleri alıp kelinip ornatıldı. Sutkasına 120 tonna dándi qayta islew quwatlılıǵına iye bolǵan kárxanada 90 tonna un, 30 tonna kepek islep shıǵarılmaqta. 25 hám50 kilogrammlıq “Besqala”, “Stella” sawda belgisi astında shıǵaralıp atırǵan un ónimleri kárxananıń eki dana Isuzu markalı júk avtomashinalarında Aral boyınıń barlıq qala hám rayonlarındaǵı, sonday-aq, Xorezm wálayatınıń sawda oraylarına jetkerip berilmekte.
– 2015-jılı qurılısı baslanǵan kárxanamızdı “Asakabank”tan alınǵan 7 milliard sumlıq kredit esesine qurıp pitkerip, bayram qarsańında paydalanıwǵa tapsırdıq, – deydi “Atiyaj-Gulzar” juwapkershiligi sheklengen jámiyeti baslıǵı Azat Mustafaev. – Maqsetimiz xalıqtı sapalı Qazaqstan unlarınan qalıspaytuǵın ózimizde óndirilgen ónim menen támiyinlewden ibarat.
Kárxanada “Besqala”, “Stella”dan tısqarı jaqın kúnlerde “Tumar” sawda belgisi astında un ónimleri islep shıǵarıla baslaydı.
Jańa kárxana jumıs baslawı menen 60 adam turaqlı jumıs penen támiyinlendi. Olardıń kópshiligin jaslar quraydı.
Qaraqalpaqstan xabar agentligi