Kegeyli rayonınıń «Júzimbaǵ» awıl puqaralar jıyını aymaǵındaǵı Azat Berganov basqarǵan «Bekzad–Azat» fermer xojalıǵında bıyılǵı jıldıń shigit egisine baǵıshlanıp kórgizbeli seminar bolıp ótti.
Oǵan rayondaǵı barlıq fermer xojalıqlarınıń baslıqları hám olarǵa xızmet kórsetiwshi mákemeler menen kárxanalardıń basshıları qatnastı.
Ilajda Qaraqalpaqstan Respublikası Joqarǵı Keńesiniń Baslıǵı M.Erniyazov shıǵıp sóylep, jıynalǵanlardı ulıwmaxalıqlıq Nawrız bayramı hám shigit egisiniń baslanıwı menen qutlıqladı.
Atap ótilgenindey, Ózbekstan Respublikası Prezidenti Shavkat Mirziyoevtiń basshılıǵında Awıl xojalıǵın jedel rawajlandırıw hám reformalardı tereńlestiriw boyınsha jumıslardıń nátiyjeliligine baǵıshlanıp usı jıl 23-mart kúni videoselektor tárizinde ótkerilgen májiliste shigit egiwdi sapalı ótkeriw hám tolıq nál alıw máselesi de dodalanıp, az ónim beretuǵın paxta atızların qısqartıw esabınan ótimli ovosh hám palız eginlerin egiw belgilendi. Sonlıqtanda, paxtashılıqtan zúráátlilikti jıldan-jılǵa arttırıp barıw, onnan mol dáramat alıw talap etiledi. Usı áhmiyetli wazıypanı atqarıwda rayon fermerleri hám taraw qánigeleri tárepinen búgingi kúnde isleniwi tiyis jumıslarǵa ayrıqsha toqtap ótildi hám egis mapazın tez kúnler ishinde sapalı juwmaqlawdıń barlıq ilajların kóriw boyınsha bahalı másláhátler berildi.
-Shigit egisin shólkemleskenlik penen ótkeriw boyınsha ilajlar baǵdarlaması islep shıǵılıp, shtab shólkemlestirildi,-deydi Kegeyli rayonlıq fermer, diyqan xojalıqları hám qıytaq jer iyeleri keńesiniń baslıǵı Abdiqádir Yusupov.-Bıyılǵı jılı, rayon boyınsha 218 fermer xojalıǵında 6330 gektar maydanǵa shigit egiw rejelestirilmekte. Bul áhmiyetli mapazdı shólkemleskenlik penen ótkeriw boyınsha 27 shigit egiw otryadı shólkemlestirilip, olarǵa 41 súrim, 66 shigit egiw seyalkası, 24 jer tegislegish, 10 chizel, 104 borona komplekt, 177 qatar arasın islewshi traktor hám basqa da awıl xojalıǵı texnikaları biriktirip berildi.
Egis mapazında kerekli janılǵı-maylaw materialları, tuqımlıq shigit, mineral tóginler menen úzliksiz támiyinlewdiń barlıq ilajları kórilmekte. Sonday-aq, mapazǵa qatnasatuǵın mexanizator hám jumısshılardı óz waqtında miynet haqıları menen támiyinlew maqsetinde 427 million sum qarjı ajıratılıp, atız baslarında ıssı awqat penen támiyinlenedi. Solay etip, egisti qısqa múddette sapalı bayıtıw názerde tutılmaqta.
Usı kúnniń ózinde jası úlken nuraniylardıń aq patiyası menen fermer xojalıǵındaǵı 1,5 gektar maydanǵa shigit egildi.
Kórgizbeli seminarǵa Qaraqalpaqstan Respublikası Ministrler Keńesi Baslıǵınıń orınbasarı S.Xojametov, rayon hákimi M.Abdirov qatnastı.
Shigit egisine baǵıshlanǵan kórgizbeli seminar Shımbay rayonındaǵı «Qamısarıq» awıl puqaralar jıyını aymaǵındaǵı Injigúl Musaeva basqarǵan fermer xojalıǵında da bolıp ótti.
D.ABIBULLAEV,
Qaraqalpaqstan xabar agentliginiń xabarshısı