Qanlıkól rayonınıń «QURILIS INVEST QANLIKOL» jeke kárxanasınıń baslıǵı Mahmud Djumaniyazov jaqında Qıtay mámleketiniń Pekin qalasında ótkerilgen «Construe Tech – 2018» kórgizbesinde qatnasıp qayttı.
Qıtay mámleketindegi Ózbekstan elshixanasında ótkerilgen ushırasıwda isbilermen Pekin qalasınıń 20 dan aslam isbilermenleri menen ushırastı. Onda farmacevtika tarawında xızmet kórsetip kiyatırǵan isbilermenler menen pikir almasıp, rayon aymaǵında qospa kárxanalar qurıw, qolaylı infrastrukturaǵa iye jer maydanın ajıratıw, mámleketimizde investorlar ushın jaratılǵan qolaylıqlar haqqında sáwbetlesti.
Sonıń menen birge M.Djumaniyazov Qıtay mámleketinde xızmet kórsetiwshi kárxanalardan biri «SANY» qurılıs kárxanasınıń Pekin qalasındaǵı ofisinde ótkerilgen ushırasıwda usı kárxana tárepinen islep shıǵarılıp atırǵan zamanagóy úskeneler, qurılıs materialları menen tanıstı.
Sapar dawamında Qıtayda islep shıǵarılıp atırǵan zamanagóy úskenelerdi satıp alıw boyınsha da bir qatar shártnamalar dúzildi.
QXA