Ózbekstan Respublikası Ádillik ministrligi tárepinen Ózbekstan Respublikası Prezidentiniń «Puqaralardı sociallıq jaqtan qollap-quwatlaw boyınsha qosımsha ilajlar hám ózbasımshalıq penen qurılǵan turaq jaylarǵa múlk huqıqın belgilew boyınsha bir mártelik ulıwma mámleketlik akciyasın ótkeriw haqqında»ǵı Pármanı joybarı tayarlanıp, dodalawǵa qoyıldı. Bul haqqında Ádillik ministrliginiń «Huquqiy axborot» kanalı arqalı málim etildi.
Bul Párman qabıl etilgen waqıttan aldın qurılıs maqsetleri ushın ajıratılmaǵan jer uchastkalarında yamasa imarat qurıw ushın ruqsatnama almastan qurılǵan turaq jayǵa (ózbasımshalıq penen qurılǵan imarat) múlk huqıqı usı obektke ózinikindey etip hadal, áshkara hám úzliksiz iyelik etken shaxslarǵa tómendegi shártler tiykarında beriledi:
– bul jer uchastkası (uchastkanıń bir bólimi) nızam hújjetlerine muwapıq turaq jay qurıw ushın ajıratılıwı múmkin bolmaǵan jer maydanında jaylaspaǵan bolıwı;
– ózbasımshalıq penen qurılǵan imarat qala qurılısı normaları hám qaǵıydaları talapların, sonday-aq, onıń saqlap qalınıwı basqa shaxslardıń huqıqları menen nızam tiykarında qorǵalatuǵın máplerin buzbawı yamasa puqaralardıń ómiri hám densawlıǵına qáwip payda etpewi kerek boladı.
Ózbasımshalıq penen qurılǵan imaratqa múlk huqıqı berilmeytuǵın anıq jaǵdaylardı Ózbekstan Respublikası Ministrler Kabineti belgileydi.
Qaraqalpaqstan xabar agentligi