Ótken shembi kúni paytaxtımızda Qaraqalpaqstan Respublikası Joqarǵı Keńesiniń Baslıǵı M.Erniyazovtıń puqaralardı qabıllawı boldı.

Ózbekstan Respublikası Prezidentiniń Qaraqalpaqstan Respublikasındaǵı Xalıq qabıllawxanasında ótken ilajǵa ministrlikler menen vedomstvolardıń, huqıq qorǵaw uyımlarınıń basshıları, jámiyetlik shólkemlerdiń, ǵalaba xabar qurallarınıń wákilleri qatnastı.

Húrmetli Prezidentimizdiń baslaması menen ótkerilip atırǵan qabıllawlar jergilikli mámleketlik hákimiyat uyımları menen puqaralar arasındaǵı birge islesiwdiń nátiyjeli mexanizmine aylanbaqta. Múrájatlar tiykarınan jumısqa ornalasıw, densawlıqtı saqlaw, bankten kredit alıw, turaq jay-kommunallıq xızmet hám basqa da máseleler boyınsha kelip túspekte.

-1987-jılı tuwılǵan balam Arıslanbek Esbergenov búyreginen kópten beri nawqas edi,-deydi Nókis qalası turǵını Gúlshad Qudiyarova.-Onı operaciya jolı menen emlew kerek. Biraq oǵan qárejetimiz jetpeydi. Sonlıqtan da Xalıq qabıllawxanasına múrájat ettim. Qaraqalpaqstan Respublikası Joqarǵı Keńesiniń Baslıǵı M.Erniyazov bizlerdi qabıl etip, densawlıqtı saqlaw ministrligi tárepinen járdem beriletuǵınlıǵın ayttı. Bunıń ushın respublikamızdıń basshısına óz minnetdarshılıǵımdı bildiremen.

-Berdaq atındaǵı Qaraqalpaq mámleketlik universitetin tamamlap, usı kúnge shekem jumıssız edim.-deydi Nókis qalasınan Ruslan Pirnazarov.-Tiyisli orınlarǵa xabarlassam da qánigeligim boyınsha jumıs taba almadım. Nátiyjede Xalıq qabıllawxanası múrájat ettim. Búgingi qabıllawda meniń múrájatım unamlı sheshilip, paytaxtımızdaǵı 27-sanlı ulıwma bilim beriw mektebine jumısqa ornalasatuǵın boldım. Bunnan júdá quwanıshlıman.

Usı kúni respublikamız basshısı tárepinen 19 puqara qabıl etilip, olardıń múrájatı taraw qánigeleri tárepinen úyrenip shıǵıldı hám tiyisli juwap berildi.

Qabıllawǵa Ózbekstan Respublikası Prezidentiniń Qaraqalpaqstan Respublikasındaǵı Xalıq qabıllawxanasınıń baslıǵı H.Xalimov qatnastı.

D.ABIBULLAEV,

Qaraqalpaqstan xabar agentliginiń xabarshısı.