Ózbekstan Respublikası Ishki isler ministrliginiń akademiyalıq liceylerine oqıwshılardı qabıl etiwde jazba jumıs (diktant), talabanlardıń fizikalıq tayarlıq dárejesin anıqlaw hám jeke tártiptegi juwmaqlawshı sáwbet ótkeriw tártibi haqqındaǵı reje Ádillik ministrliginde mámleketlik dizimnen ótkerildi. Bul haqqında Ádillik ministrliginiń «Huquqiy axborot» kanalı málim etti.
Rejege muwapıq, talabanlardı akademiyalıq liceyge qabıllawda ótkeriletuǵın arnawlı-professional tańlawdıń tómendegi basqıshları belgilendi:
– talabanlardıń orfografiyalıq hám punktuaciyalıq sawatlılıq dárejesin anıqlaw boyınsha sınaw-diktant;
– fizikalıq tayarlıq dárejesin anıqlaw boyınsha sınaw;
– jeke tártiptegi juwmaqlawshı sáwbetlesiw.
Arnawlı-professionallıq tańlaw nátiyjelerine muwapıq talabandı test sınaqların tapsırıwǵa qoyıw máselesi sheshiledi.
Tańlawdıń basqıshları qabıllaw jılınıń 1-iyunınan 25-iyunına shekem ótkeriledi.
Sonday-aq, rejede sınawlardı ótkeriw metodikası hám bahalaw kriteriyaları da anıq belgilep berildi.
Qaraqalpaqstan xabar agentligi