Arqa-Batıs áskeriy okruginde «Jas shegarashılar» tańlawınıń Qaraqalpaqstan Respublikalıq basqıshı bolıp ótti.
Ózbekstan jaslar awqamı Qaraqalpaqstan Respublikalıq keńesi, Orta arnawlı kásiplik bilimlendiriw basqarması tárepinen mápdar shólkemler menen birgelikte shólkemlestirilgen tańlawǵa shegara aldı rayonlarında jaylasqan kásip-óner kolledjleri, akademiyalıq licey hám ulıwma bilim beriw mekteplerinen jeti komanda qatnastı.
Ilajdıń maqseti, elimizdiń qáwipsizligin támiyinlewde ósip kiyatırǵan jas áwladta juwapkershilik sezimin qáliplestiriw, olardı xalqımızǵa, Prezidentimizge hám Watanımızǵa sadıqlıq ruwxında tárbiyalaw, mámleket shegaraların qorǵaw ádiwli minnet ekenligin úgit-násiyatlaw, shaqırılıwshılardı áskeriy xızmetke tayarlaw bolıp tabıladı.
Tańlaw qatnasıwshıları jámiyetlik-siyasiy hám huqıqıy bilimler sınaǵı, oq atıw tayarlıǵı, Ózbekstan Respublikasınıń «Ózbekstan Respublikası Mámleketlik shegarası haqqında»ǵı Nızamı, shegarashı qaharmanlar haqqındaǵı «Umıtılmas jarqın juldızlar» kitabı boyınsha, sap tartıp júriw, medicinalıq-sanitariyalıq, fizikalıq-áskeriy tayarlıq basqıshları boyınsha ózleriniń bilim jáne kónlikpelerin sınaqtan ótkerdi.
Ilaj juwmaǵında Ámiwdárya melioraciya hám suw xojalıǵı kásip-óner kolledjiniń «Burgut» komandası birinshi, Shomanay pedagogika hám xızmet kórsetiw kásip-óner kolledjiniń «Turan» komandası ekinshi, Xojeli transport kásip-óner kolledjiniń «Jasurlar» komandası úshinshi orınlardı iyeledi.
Jeńimpazlar hám belsene qatnasqan komandalar shólkemlestiriwshiler tárepinen Diplom jáne bahalı sawǵalar menen sıylıqlandı.
Qaraqalpaqstan xabar agentligi.