Usı jılı Nókiste X.Abdambetov gúzarı boyınan 2,7 gektar jer maydanda jas shańaraqlar, tozǵan jaylarda jasawshılar hám turaq jay sharayatın jaqsılawǵa mútáj bolǵan basqa da puqaralar ushın 450 xanalı 10 kóp qabatlı turaq jaylar qurıladı.

Bul turaq jaylar qala qurılısınıń zamanagóy talaplarına muwapıq túrde, energiyanı nátiyjeli hám únemli jumsaytuǵın texnologiyalar menen úskenelenip, zamanagóy qurılıs materialların hám konstrukciyaların qollanǵan halda salınadı.

Jaylardıń ulıwma bahasınan baslanǵısh tólemi 1-qabat ushın 35%, 2-qabat ushın 40%, 3-qabat ushın 30%, 4-qabat ushın 25%, 5-qabat ushın 20% muǵdarında tólew belgilengen. «Wzshaharsozlik LITI» MUK joybarlaw mákemesiniń dáslepki joybar hújjetlerine tiykarlanıp, kvartiranıń maydanına salıstırǵanda bir kvadrat metriniń bahası 2 million 841 mıń 170 sum muǵdarında etip belgilep berilgen.

«Ipoteka bank» AKIB, «Ózsanaatqurılısbank» AKB hám «Asaka bank» AKBniń jeńilletilgen ipoteka kreditleri esabınan qurılatuǵın bul jaylardı satıp alıw ushın qarız alatuǵınlarǵa ipoteka kreditlerin beriw 20 jıl múddetke, sonnan 5 jıllıq jeńilletilgen dáwir menen beriledi.

Esletip ótemiz, paytaxtımızdaǵı bul kóp qabatlı arzan jaylardıń qurılısı Ózbekstan Respublikası Prezidentiniń 2017-jıl 23-oktyabrdegi «2017-2020-jıllarda qalalarda arzan kóp kvartiralı jaylardı qurıw hám rekonstrukciyalaw baǵdarlamasın nátiyjeli ámelge asırıw boyınsha qosımsha ilajlar haqqında»ǵı qararınıń orınlanıwı sheńberinde ámelge asırılmaqta.

Á.Jiemuratov,

Qaraqalpaqstan xabar agentligi