Ferǵanada Ózbekstan Respublikası hám Qırǵızstan Respublikası Bas ministrleriniń basshılıǵında eki mámlekettiń shegaralas wálayatları basshıları keńesiniń birinshi májilisi bolıp ótti.
Ózbekstan Respublikası Bas ministri A.Aripov hám Qırǵızstan Respublikası Bas ministri S.Isakov ellerimiz arasındaǵı strategiyalıq sheriklik qatnasıqları, doslıq, jaqın qońsıshılıq hám óz-ara isenimge tiykarlanǵan birge islesiwdi rawajlandırıw jáne bekkemlew boyınsha ámelge asırılıp atırǵan jumıslar jańa basqıshqa kóterilgenin atap ótti.
Elimizdiń sırtqı siyasatında, bárinen burın, qońsı mámleketler menen qatnasıqlardı rawajlandırıwǵa úlken áhmiyet qaratılmaqta. Sońǵı waqıtta Oraylıq Aziya elleri arasındaǵı sheriklik baylanısları jedellesip atırǵanı bunı ayqın dálilleydi. Sonıń ishinde, Qırǵıztan Respublikası menen birge islesiw jańa mazmun menen bayıp barmaqta. Parlamentler, túrli ministrlikler hám vedomstvolar, aymaqlar arasında baylanıslar barǵan sayın keńeymekte.
Prezident Shavkat Mirziyoevtiń 2017-jıl 5-6-sentyabr kúnleri Qırǵızstanǵa mámleketlik saparı waqtında Ózbekstan Respublikasınıń shegaraaldı wálayatlarınıń hákimleri hám Qırǵıztan Respublikası húkimetiniń shegaraaldı wálayatlarındaǵı wákillikli wákilleri keńesin shólkemlestiriw haqqında húkimetleraralıq túsinisiw memorandumına qol qoyılǵan edi. Bul keńes táreplerdiń óz-ara birge islesiwin rawajlandırıw, turaqlı montioringti hám talqılawdı alıp barıw, ásirese, shegaraaldı wálayatlar arasında qatnasıqlardı bekkemlew, hár qıylı usınıslar islep shıǵıw hám mashqalalardı ámeliy sheshiwde úlken áhmiyetke iye bolıp tabıladı.
Májiliste shegaraaldı aymaqlar arasında óz-ara birge islesiwdi jolǵa qoyıw, sawda-ekonomikalıq, investiciyalar tartıw, turizm, mádeniy hám aǵartıwshılıq tarawlarında baylanıslardı keńeytiw, Ózbekstan-Qırǵızstan mámleketlik shegarasında puqaralar ushın sharayatlardı jaqsılaw hám qadaǵalaw-ótkeriw punktleriniń sanın kóbeytiw sıyaqlı áhmiyetli máseleler dodalandı.
Sonı ayrıqsha atap ótiw kerek, qısqa waqıt ishinde shegaraaldı wálayatlar arasında jaqsı qońsıshılıq baylanıslar jolǵa qoyıldı. Nawrız bayramı qarsańında Botken wálayatı delegaciyası Ferǵana wálayatına, Jalalabad wálayatı delegaciyası Namangan wálayatına keldi, Osh qalasınan bolsa Ándijan qalasına doslıq saparı shólkemlestirildi. Ekonomikalıq, mádeniy-aǵartıwshılıq baylanıslar jáne de bekkemlendi.
Ilaj sheńberinde Ferǵana, Ándijan hám Namangan wálayatlarındaǵı sanaat kárxanaları hám isbilermenler islep shıǵarıp atırǵan ónimlerdiń kórgizbesi shólkemlestirildi. Qońsı eldiń wákilleri qatnasıp atırǵan kórgizbede bir qatar paydalı shártnamalarǵa qol qoyıldı.
-Ózbekstan menen Qırǵızstan arasında barlıq tarawlarda birge islesiw jolǵa qoyılıp atırǵanı eki tárep ushın da úlken imkaniyatlar jaratpaqta,-deydi Qırǵıstan Respublikası investiciyalardı tartıw hám qorǵaw agentligi direktorı E.Momunqulov.-Elimizde Ózbekstanda islep shıǵarılıp atırǵan ónimlerge talap kúshli. Házirgi kúnde avtomobiller, awısıq bólekler, trikotaj ónimlerin satıp almaqtamız. Prezident Shavkat Mirziyoev tárepinen dúnya boylap investiciyalar tartıw, isbilermenler ushın qolaylı isbilermenlik ortalıǵın jaratıp beriw boyınsha ámelge asırılıp atırǵan úlken jumıslar maqtawǵa ılayıq. Biz ózbekstanlı isbilermenler menen turizm tarawında da birge islesiwdi jolǵa qoyıwdı maqset etkenbiz.
Májiliste shegaraaldı wálayatlar arasında doslıq baylanısların bunnan bılay da bekkemlew, perspektivalı hám keń kólemli birge islesiw máselelerine de ayrıqsha itibar qaratıldı. Keńestiń gezektegi májilisin Qırǵızstan Respublikasında ótkeriwge kelisip alındı.
Kórilgen máseleler boyınsha protokolǵa qol qoyıldı.
M.SULAYMANOV,
ÓzA nıń xabarshısı