Aldın xabar etkenimizdey, elimizde dóretiwshilik saparda bolıp turǵan Ullıbritaniyanıń jáhánge belgili Bi-Bi-Si teleradiokorporaciyasınıń dúnyajúzilik xızmeti dóretiwshilik jámááti Aral mashqalası tuwralı qısqa metrajlı filmdi súwretke alıw jumısların juwmaqladı.
Jurnalist hám prodyuser Rustam Qabıl, videoprodyuser Pol Harris tórt kún dawamında Moynaq rayonında, Aral teńizi jaǵalawlarında bolıp, ekologiyalıq apatshılıqtı saplastırıw, xalıqtıń turmıs dárejesin jaqsılaw baǵdarında ámelge asırılıp atırǵan jumıslardı súwretke aldı. Sonıń menen birge, toǵay xojalıǵı tárepinen Aral teńiziniń qurıǵan maydanlarında seksewil, qandım, cherkez sıyaqlı duzǵa hám qurǵaqshılıqqa shıdamlı ósimliklerdi tuqımnan jáne nálden egiw jumısları menen tanıstı. Ózbekstan Respublikası Prezidentiniń «Qaraqalpaqstan Respublikası Moynaq rayonın 2017-2018-jıllarda sociallıq jaqtan rawajlandırıw hám xalıqtıń bántligin támiyinlew boyınsha qosımsha ilajlar haqqında»ǵı qararı sheńberinde ámelge asırılǵan joybarlar, xalıqtıń densawlıǵın saqlaw hám bántligin támiyinlew baǵdarındaǵı jumıslardı kózden ótkerdi, rayon turǵınları menen sáwbetlesti.
-Óziniń kórsetiwleri menen esittiriwlerin dúnya júziniń 40tan aslam tillerinde alıp baratuǵın Bi-Bi-Si teleradiokorporaciyası global ıqlım ózgeriwi hám ekologiyalıq mashqalalardıń aqıbetlerin saplastırıw boyınsha dúrkin qısqa metrajlı filmlerdi súwretke alıw jumısların basladı,-deydi jurnalist-prodyuser Rustam Qabıl.- Bunıń ushın usı mashqalalardı saplastırıwda sońǵı jılları jaqsı nátiyjelerge erisip atırǵan jáhánniń on mámleketi, sonıń ishinde Ózbekstan tańlap alındı. Filmdi súwretke alıwdaǵı maqsetimiz Ózbekstan Respublikası Prezidenti Shavkat Mirziyoevtiń basshılıǵında Aral apatshılıǵınıń aqıbetlerin saplastırıw, ekologiyalıq aymaqta jasawshı xalıqtıń turmıs dárejesin jaqsılaw boyınsha alıp barılıp atırǵan keń kólemli jumıslardı jáhán jámiyetshiliginiń itibarına jetkeriw bolıp tabıladı.
-Ózbekstanda, sonıń ishinde Qaraqalpaqstanda birinshi márte bolıwım,-deydi videoprodyuser Pol Harris.-Súwretke alıw procesiniń suwıq kúnlerge tuwra keliwi biraz mashqalalardı payda etti. Solay bolsa da, xalqıńızdıń miymandoslıǵı, mádeniyatı menen milliy úrp-ádetleri mende ayrıqsha tásir qaldırdı.
Ózbekstanda ámelge asırılıp atırǵan keń kólemli reformalar jáhán jámiyetshiliginiń ayrıqsha qızıǵıwshılıǵın oyatpaqta. Keleshekte usı jetiskenlikler tuwralı film alıwdı maqset etip otırmız. Waqıttıń azlıǵınan Qaraqalpaqstan, onıń paytaxtı Nókis qalasındaǵı qurılıs jáne dóretiwshilik isler menen tolıq tanısıw imkaniyatı bolmadı. Degen menen, dúnyaǵa belgili I.V.Savickiy atındaǵı kórkem óner muzeyi eksponatların tamasha etiwge waqıt tapqanımnan quwanıshlıman.
Bi-Bi-Si teleradiokorporaciyasınıń dúnyajúzilik xızmeti dóretiwshilik jámááti tárepinen súwretke alınǵan bul film jaqın kúnlerde tamashagóyler názerine usınıladı.
D.ABIBULLAEV,
Qaraqalpaqstan xabar agentliginiń xabarshısı.