Usı jıldıń 2-aprel kúni Berdaq atındaǵı Qaraqalpaq mámleketlik universitetiniń tábiyattanıw fakultetinde «1-aprel – Xalıq aralıq quslar kúni» múnásibeti menen «Quslar – báhár elshisi» atamasında ilimiy seminar bolıp ótti. Seminardı fakultet dekanı Á.Esimbetov ashtı hám basqarıp bardı. Ilajda Ózbekstan quslardı qorǵaw jámiyetiniń Qaraqalpaqstan filialı jáne universitettiń ekologiya hám topıraqtanıw kafedrasınıń baslıǵı Ya.Ámetov shıǵıp sóylep, quslardıń kóbeyiwi, jasaw sharayatları, usı baǵdardaǵı insan faktorı haqqında jıynalǵanlarǵa keń túrde maǵlıwmat berip ótti. Bunnan soń Quslardı qorǵaw jámiyeti Qaraqalpaqstan filialınıń aǵzası, fakultettiń biologiya kafedrasınıń assistent-oqıtıwshısı I.Árepbaev aq quyrıqlı suw búrkitiniń Qaraqalpaqstan aymaǵında uya salıwı haqqında qızıqlı maǵlıwmatlarǵa bay bolǵan bayanat jasadı. Seminarda fakultette dúzilgen «Otus» klubınıń aǵzaları da sózge shıǵıp, Qaraqalpaqstan aymaǵında jasaytuǵın quslar haqqında maǵlıwmatlar berdi.
Seminarǵa Nókis qalasındaǵı birneshe mekteplerdiń oqıwshıları da qatnastı. Ilajdıń ekinshi – ámeliy bóliminde mektep oqıwshıları arasında quslardıń jasaw sharayatları hám basqa da kórinisleri sáwlelengen súwretler tańlawı ótkerildi hám qatnasıwshı oqıwshılar fakultet jámááti tárepinen tayarlanǵan sawǵalar menen sıylıqlandı.
Islam Matekov,
Qaraqalpaqstan xabar agentliginiń sholıwshısı.