Usı jıldıń iyun-iyul aylarında puqaralardıń ózin-ózi basqarıw uyımları jumısların muwapıqlastırıw boyınsha respublikalıq Keńestiń baslaması menen sporttıń badminton túri boyınsha «Máhállemiz badmintonshıları» jarısınıń qalalıq hám rayonlıq basqıshları ótkerilgen edi.
Bul jarıslarǵa tórt mıńnan aslam 30 jasqa shekemgi jas shańaraqlar hám 11 jastan 14 jasqa shekemgi jaslar, sonnan 600 den aslam kem támiyinlengen shańaraqlardıń balaları qatnastı.
12-iyul kúni paytaxtımızda usı jarıstıń Qaraqalpaqstan Respublikalıq basqıshı bolıp ótti.
Onda 30 shańaraqtıń 30 ul hám qız balalarınan dúzilgen 15 komanda óz-ara kúsh sınastı.
Jarıstı shólkemlestiriwdiń tiykarǵı maqseti, elimizde sporttıń badminton túrin ele de keńirek úgit-násiyatlaw hám ǵalaba en jaydırıw, jaslardı sportqa keńnen tartıw, oqıwshılardıń oqıwdan bos waqıtların nátiyjeli shólkemlestiriw, ósip kiyatırǵan jas áwlad arasında salamat turmıs tárizin qáliplestiriw, jas shańaraqlardıń awızbirshiligin hám tatıwlıǵın bunnan bılay da kúsheytiw bolıp esaplanadı.
Jarıs nátiyjesi boyınsha 30 jasqa shekemgi shańaraqlar (er hám hayal) arasında Nókis qalasınan M.Ismetullaevlardıń shańaraǵı birinshi, Qaraózek rayonınan D.Sultanovlardıń shańaraǵı ekinshi, Xojeli rayonınan A.Mambetalievlerdiń shańaraǵı úshinshi orındı iyeledi.
11-14 jasqa shekemgi ul balalar arasında Nókis qalasınan D.Asqarov birinshi, Xojeli rayonınan S.Arazdurdiev ekinshi, Qaraózek rayonınan N.Sarqıtbaev úshinshi orındı iyeledi. Al, qızlar arasında Nókis qalasınan Z.Sharipova birinshi, Tórtkúl rayonınan B.Madaminova ekinshi, Z.Genjemuratova úshinshi orındı iyeledi.
Jeńimpazlar «Máhálle» qayırqomlıq jámiyetlik fondı hám birge islesiwshi shólkemler tárepinen tayarlanǵan estelik sawǵaları hám húrmet jarlıqları menen sıylıqlandı.
Á.Jiemuratov,
Qaraqalpaqstan xabar agentliginiń xabarshısı.