MÁMLEKETLIK XÍZMETLER KÓRSETIW SISTEMASÍN JETILISTIRIW MÁSELELERINE BAǴÍShLANDÍ

Ózbekstan Respublikası Prezidenti Shavkat Mirziyoevtiń basshılıǵında 4-aprel kúni xalıq hám isbilermenlik subektlerine mámleketlik xızmetler kórsetiw baǵdarındaǵı jumıslardı talqılaw hám aldaǵı eń áhmiyetli wazıypalarǵa baǵıshlanǵan májilis ótkerildi.

Burın isbilermenlikti jolǵa qoymaqshı, qandayda bir firma yamasa kárxana ashpaqshı bolǵan adam hújjet tayarlaw procesinde áwere-sergizdan bolatuǵın edi. Notarius, arxiv yamasa kadastr uyımınan, gaz, elektr, suw támiynatı shólkeminen yamasa máhálleden ápiwayı bir maǵlıwmatnama alıw ushın da geyde kún boyı gezekte turıwǵa tuwra keletuǵın edi.

Búgin de bir qatar mámleketlik uyımlarda málimleme sistemaları, resursları hám maǵlıwmatlar bazası joq ekeni mámleketlik xızmetler kórsetiwde belgili bir qıyınshılıqlar tuwdırmaqta. Málimleme-kommunikaciya texnologiyaları engiziliwiniń tómen dárejede ekeni hám qaǵaz hújjetler aylanısınıń saqlanıp qalǵanı tiykarsız qarjı qárejetlerine, puqaralardıń artıqsha kútip qalıwına hám náwbetlerdiń júzege keliwine, bul bolsa, aqıbetinde ayırım korrupciya hám byurokratiya jaǵdaylarına alıp kelmekte.

Elimizdi rawajlandırıwdıń zamanagóy basqıshında insan mápleri bas ólshem sıpatında belgilengeni jáne «Xalıq mámleketlik uyımlarǵa emes, mámleketlik uyımlar xalqımızǵa xızmet etiwi kerek» degen ullı ideya alǵa qoyılǵanı mámleketlik uyımlar tárepinen kórsetiletuǵın xızmetlerdi bunnan bılay da jetilistiriwdi talap etpekte.

Prezidentimiz Shavkat Mirziyoevtiń 2017-jıl 12-dekabrdegi «Xalıqqa mámleketlik xızmetler kórsetiwdiń milliy sistemasın túp-tiykarınan reformalaw ilajları haqqında»ǵı pármanına muwapıq Ádillik ministrligi janında Mámleketlik xızmetler agentligi shólkemlestirildi. 2018-jıl 1-yanvardan «bir ayna» orayları Xalıq qabıllawxanaları janındaǵı Mámleketlik xızmetler oraylarına aylandırıldı.

Búgingi kúnde bul oraylar tárepinen balalardı mektepke shekemgi bilimlendiriw mákemelerine qabıl etiw boyınsha arza beriw, puqaranı jıynalıp barılatuǵın pensiya sistemasında esapqa alıw, injenerlik-kommunikaciya tarmaqlarına jalǵanıw, joybarlaw hújjetlerin kelisiw, qurılıs-montajlaw jumısların ámelge asırıwǵa, jeke tártipte turaq-jay qurıwǵa (rekonstruciyalawǵa) ruqsat beriw, suwdan arnawlı paydalanıw yamasa suwdı arnawlı tutınıw ushın ruqsat beriw sıyaqlı xızmetler kórsetiw jolǵa qoyılǵan. Bas prokratura hám Ádillik ministriligine oraylar arqalı kórsetiletuǵın mámleketlik xızmetler túrin bunnan bılay da kóbeytiw boyınsha kórsetpeler berildi.

Mámleketlik xızmetlerdiń hár bir túri «Puqaralar emes, hújjetler háreketetedi» principine bola, wákillikli mámleketlik uyımlar, shólkemler zárúr hújjetler hám málimlemelerdi basqa da strukturalardan erkin túrde alıwdıń esabınan jeńilletiledi.

Álbette, adamlardıń múshkilin jeńilletetuǵın, zamanagóy texnologiyalarǵa tiykarlanǵan bul sistema xalqımızǵa úlken qolaylılıq jaratpaqta. Biraq ele orınlarda ayırım kemshilikler bar ekeni jedel hám sapalı xızmetler kórsetiwde qıyınshılıq tuwdırmaqta.

Máselen, ayırım wákillikli uyımlarda mámleketlik xızmet kórsetiwler boyınsha elektron málimleme sisteması tolıq engizilmegen, vedomstvolararalıq elektron málimleme almasıwı jolǵa qoyılmaǵan. Ayırım Mámleketlik xızmetler orayları optikalıq talshıqlı Internet tarmaǵına jalǵanbaǵan.

Májiliste bul mashqalalar sın kózqarastan talqılanıp, Ádillik ministriligi, Málimleme texnologiyaların hám kommunikaciyaların rawajlandırıw ministrligi jáne basqa da tiyisli uyımlarǵa 50 mámleketlik xızmetler boyınsha elektron málimleme sistemasın hám elektron maǵlıwmatlar bazasın jaratıw, barlıq mámleketlik xızmetler orayların optikalıq talshıqlı internetke jalǵaw boyınsha tapsırmalar berildi.

Sonday-aq, barlıq oraylarda elektron náwbet sistemasın iske túsiriw, uyalı telefonlar arqalı mámleketlik xızmetlerden paydalanıw imkaniyatın beretuǵın baǵdarlamalar jaratıw zárúrligi atap ótildi.

Mámleketlik xızmetler orayları imaratınıń úlgi joybarların islep shıǵıw hám mámleketlik-jeke menshik sheriklik tiykarında zamanagóy etip qurıw, bul boyınsha investorlarǵa jeńillikler beriw wazıypası qoyıldı.

Isbilermenlikke baylanıslı 35 túrdegi licenziya hám ruqsatnamalar húkimet tárepinen beriledi. Bunday oǵada oraylasıw isbilermenliktiń rawajlanıwına tosqınlıq etedi. Sonlıqtan, «Jedel isbilermenlikti, innovaciyalıq ideyalardı hám texnologiyalardı qollap-quwatlaw jılı» Mámleketlik baǵdarlamasına muwapıq, licenziyalar hám ruqsat beriw tártip-qaǵıydaların keskin qısqartıw hám ápiwayılastırıw boyınsha anıq wazıypalar belgilep berildi.

Kadastr hám qurılıs tarawlarında mámleketlik xızmetler kórsetiw qanaatlandırarsız jaǵdayda ekeni qatań sınǵa alındı. «Jergeodezkadastr» komitetine Mámlimleme texnologiyaların hám kommunikaciyaların rawajlandırıw ministrligi menen birgelikte kóshpes múlk obektleriniń kadastr hújjetlerin elektron tártipte júrgiziw, kadastr gúwalıqların qaǵazda emes, al elektron reestrden kóshirme tárizinde beriw ámeliyatın engiziw wazıypası tapsırıldı. Sonday-aq, barlıq ruqsatnama hám licenziyalardı elektron sistema arqalı beriw imkaniyatın beretuǵın «Licenziya» málimleme kompleksin usı jıldıń may ayına shekem tolıq iske túsiriw zárúrligi atap ótildi.

Májiliste atap ótilgenindey, 2021-jılǵa shekem 5 millionnan aslam avtotransport basqarıw gúwalıqların jańasına almastırıw zárúr. Biraq bul boyınsha hár bir wálayatta 3-4, elimizde jámi 49 struktura ǵana bar. Endi avtotransport basqarıw gúwalıqların almastırıp beriw de Mámleketlik xızmetler orayları arqalı ámelge asırıladı. Bul ushın oraylarǵa jol háreketi qáwipsizligi wákili biriktiriledi.

Kóshpeli qabıllawlarda bildirilgen usınıslardı esapqa alıp, Ádillik ministrligine Tashkent mámleketlik yuridika universitetiniń bakalavr basqıshına hújjetlerdi orınlardaǵı mámleketlik xızmetler orayları arqalı tapsırıwdı tájiriybe tárizinde engiziw boyınsha kórsetpeler berildi.

Májiliste tarawǵa juwapker basshılardıń esapları tıńlandı. Mámleketlik xızmetler kórsetiw sistemasın jetilistiriw boyınsha áhmiyetli wazıypalar belgilep berildi.

ÓzA

  05.04.2018, 16:30  |    80 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi