Ózbekistan Respublikası Prezidenti Shavkat Mirziyoev 11-iyul kúni Tashkentke ámeliy sapar menen kelgen Túrkmenstan Ministrler Kabineti Baslıǵınıń orınbasarı – sırtqı isler ministri Rashid Meredovtı qabıl etti.
Ushırasıw basında mámleketimiz basshısı dos Túrkmenstan xalqına hám Prezident Gurbanguli Berdimuhamedovqa óziniń tereń húrmetin bildirip, shın júrekten sálemin jolladı.
Siyasiy, sawda-ekonomikalıq, transport-kommunikaciyalıq hám mádeniy-gumanitarlıq salalarda óz-ara qatnasıqlar izbe-iz rawajlanıp, bekkemlenip atırǵanı qanaatlanıwshılıq penen atap ótildi.
Ózbekistan Prezidentiniń Túrkmenstanǵa usı jıldıń mart ayındaǵı dáslepki mámleketlik sapar etiwi, may hám iyun aylarında «Avaza» turistlik zonası hám Qazaqstan paytaxtı Astanadaǵı ámeliy ushırasıwlar, sonday-aq, eki mámleket basshılarınıń turaqlı sóylesiwleri Ózbekistan menen Túrkmenstannıń birge islesiwin sapa jaǵınan jańa basqıshqa alıp shıqqanı hám Strategiyalıq sheriklik haqqındaǵı shártnamanıń qaǵıydaların ámelge asırıwdı támiyinlep atırǵanı atap ótildi.
Házirgi waqıtta kelisimlerge muwapıq Ózbekistan hám Túrkmenstan kompaniyaları menen kárxanaları bahası 200 million dollardan aslam birgeliktegi sırtqı sawda shártnamaları menen kelisimlerdi ámelge asırmaqta.
Awıl xojalıǵı mashina qurılısı salasında sistemalı hám uzaq múddetli birge islesiw jolǵa qoyıldı, Túrkmenstanǵa gezektegi paxta teriw mashinaları, kultivator hám basqa da zamanagóy texnikalar jetkerip berildi. Usı ayda Ashxabadta Sawda-servis orayı óz jumısın baslaydı.
«Ózbekistan temir jolları» akcionerlik jámiyeti kárxanaları bazasında Túrkmenstan temir jollarınıń háreketleniwshi quramın ońlaw hám modernizaciyalaw jumısları alıp barılmaqta.
Túrkmenabad – Farab avtomobil hám temir jol kópirleri ashılǵannan soń, ellerimiz arasında tranzit júk tasıwlardıń kólemi sezilerli dárejede kóbeydi. Ózbekistannıń tek ǵana temir jol arqalı Túrkmenstan aymaǵınan ótken eksport júkleriniń kólemi 25 procentke arttı.
Mádeniy-gumanitar salada da birge islesiw jedel rawajlanbaqta. Tashkentte Ashxabad baǵın shólkemlestiriw jumısları baslandı. Sentyabr ayında sportshılarımız Túrkmenstan paytaxtında jabıq obektlerde hám jawıngerlik ónerleri boyınsha bolıp ótetuǵın gezektegi Aziya oyınlarında qatnasadı.
Sáwbetlesiw waqtında ellerimiz arasında ámeliy birge islesiwdi keńeytiw, strategiyalıq sheriklikti bekkemlewge qaratılǵan jańa baǵdarlardı beligilew hám perspektivalı joybarlardı birgelikte ámelge asırıw máseleleri dodalandı.
Tárepler regionallıq hám xalıqaralıq siyasattıń áhmiyetli máseleleri boyınsha da pikir alıstı.
Túrkmenstan Ministrler Kabineti Baslıǵınıń orınbasarı – sırtqı isler ministri Rashid Meredov Prezident Gurbanguli Berdimuhamedovtıń Ózbekistan xalqına hám onıń basshısı Prezident Shavkat Mirziyoevqa tereń húrmetin jáne jaqsı tileklerin jetkerdi. R.Meredov Túrkmenstan eki mámleket arasındaǵı keń kólemli birge islesiwdi bunnan bılay da rawajlandırıwǵa tayar ekenin atap ótti.
ÓzA