Usı jıldıń aprel ayında Qaraqalpaq mámleketlik universiteti Jurnalistika tálim baǵdarı studentleri Qanlıkól rayonına mediatur shólkemlestiredi. Bul haqqında Qanlıkól rayonı hákiminiń orınbasarı Quralbay Abdikarimov Berdaq atındaǵı Qaraqalpaq mámleketlik universiteti Qaraqalpaq filologiyasi fakulteti jurnalistika qánigeligi studentleri menen ushırasıwda málim etti.
Bolajaq jurnalistler menen tıǵız islesiw baslaması menen shıǵıp atırǵan Qanlıkól rayonı hákimligi rayon turmısı, rayonda alıp barılıp atırǵan sociallıq-ekonomikalıq reformalar haqqında jámiyetshilikti keńnen tanıstırıp barıwdı maqset etken.
Rayon hákimligi baslaması menen jaqında rayonnıń turmısın sáwlelendiriwshi kanews.uz hám ulıwma ekonomika tarawı jańalıqların sáwlelendirip barıwshı business-portal.uz saytları iske tústi.
Bunnan bılay student-jurnalistler usı saytlarǵa dóretiwshilik jumısları menen qatnasıwı múmkin.
Aprelde ótkeriliwi rejelestirilip atırǵan mediaturda bolsa rayonda boy tiklep atırǵan zavod hám fabrikalarǵa, sociallıq obektlerge sayaxat etiw názerde tutılǵan.
Mediatur juwmaǵı menen bolajaq jurnalistler respublikalıq ǵalaba xabar qurallarında hám Internet saytlarında jurnalistlik materiallar tayarlaydı.
Ajimuratov Paraxat
QMU jurnalistika qánigeligi 2-kurs studenti