Ministrler Kabinetiniń 18.03.2018 jıldaǵı 205-sanlı «Diyqan xojalıqları hám qıytaq jer uchastkalarınan nátiyjeli paydalanıwdı shólkemlestiriw ilajları haqqında»ǵı qararı daǵazalandı, dep jazbaqta Norma.
Esletip ótemiz, Prezidenttiń 10.10.2017-jıldaǵı PQ-3318-sanlı qararı menen qıytaq jer uchastkalarınan paydalanıw tártibin buzıp atırǵan jer iyelerine qarata qollanılatuǵın ilajlar belgilengen:
jer salıǵınıń 3 ese arttırılǵan muǵdarı-jeke tártipte úy-jay qurıw hám turaq-jaydı abadanlastırıw ushın berilgen jer uchastkalarınıń qıytaq jer bóliminde tiykarsız túrde awıl xojalıǵı eginlerin ekpese yamasa abadanlastırılmasa;
jer uchastkasına bolǵan huqıq biykar etiledi-diyqan xojalıǵın júritiw ushın turaq-jay qurıw huqıqısız berilgen jer uchastkalarında awıl xojalıǵı eginlerin ekpegende.
Ministrler Kabineti qabıl etilgen qararda bunday jerlerden paydalanıw nátiyjeliligin arrtırıw maqsetinde usı sankciyalardı qollanıw mexanizmleri belgilengen.
1-basqısh. Nátiyjeli paydalanıw boyınsha usınıslardı islep shıǵıw
Rayon hákiminiń qararına muwapıq qıytaq jer uchasikalarınan nátiyjeli paydalanıw jaǵdayın úyreniw boyınsha rayon fermer, diyqan xojalıqları hám qıytaq jer iyeleri keńesiniń basshısınıń basqarıwında isshi topar shólkemlestiriledi. Onıń quramına usı keńes, sonday-aq, tómendegi bólimlerdiń wákilleri kiredi: Awıl xojalıǵı bólimi, suw xojalıǵı bólimi, jer resursları hám mámlektlik kadastrı bólimi, kásiplik awqamları, hayal-qızlar komiteti, bántlikke kómeklesiw orayı, puqaralardıń ózin-ózi basqarıw uyımlarınıń jumısın muwapıqlastırıw boyınsha keńes, mámleketlik salıq inspekciyası hám basqa mápdar shólkemler hám profilaktika inspektorı.
Isshi topar hár jılı úyme-úy júredi. Qıytaq jer uchastkalarınıń maydanları, topıraq-ıqlımnıń shárayatı hám suwdıń támiynatınan kelip shıǵıp eginniń túrleri, miyweli tereklerdiń túri hám sanı, sharwashılıq malları hám tawıqlardıń sanı, sonday-aq, olardıń jıl dawamında qıytaq jr uchastkasında jetistiriletuǵın ónim túrleri hám satıw muǵdarları jáne de ıssıxana qurıw, sharwashılıq malları hám tawıq baǵıwǵa bolǵan qálewi úyrenip shıǵıladı. Úyreniw nátiyjeleri boyınsha isshi topar arnawlı formada maǵlıwmatnama toltıradı, úyreniw nátiyjeleri bolsa ulıwmalastırıladı hám puqaralar jıyını kóleminde tayarlanǵan maǵlıwmatlar rayon hákimine 10-fevralǵa shekem usınıladı.
2-basqısh. Boljaw kórsetkishlerin tastıyıqlaw.
Usınılǵan maǵlıwmatlar rayon hákimi tárepinen úyrenip shıǵıladı hám 15-fevralǵa shekem qıytaq jer uchastkaları baǵdarında jetistiriletuǵın eginniń hám ónimniń túrleri, olardı satıw kólemleri, sonday-aq, ıssıxanalar qurıw, miyweli hám dekoraciyalı terkeler egiw jáne de sharwa malların hám tawıqların satıp alıw prognoz kórsetkishlerin (keyingi orınlarda boljaw kórsetkishleri dep ataladı) tastıyıqlaw haqqında qarar qabıl etedi.
Bul qarar xalıq deputatlarınıń rayonlıq keńesine kórip shıǵıw ushın kirgiziledi. (20-fevralǵa shekem tastıyıqlanadı).
Boljaw kórsetkishler sektor basshılarınıń hám puqaralardıń ózin-ózi basqarıw uyımları tárepinen diyqan xojalıqlarınıń baslıqlarına hám qıytaq jer iyelerine olardıń alǵanlıǵın tastıyıqlaytuǵın qol qoyılǵan halda jetkeriledi.
3-basqısh. Boljaw kórsetkishleriniń orınlanıwı monitoringin ámelge asırıw
Isshi topar sektor basshıları menen birgelikte boljaw kórsetkishleriniń orınlanıwı monitoringin ámelge asıradı. Qaǵıyda sıpatında, monitoring jumısları egiw (mart-aprel, avgust-sentyabr, noyabr-dekabr ayları) hám tárbiyalaw dáwiri boyınsha belgilenedi.
Rayonlıq fermer, diyqan xojalıqları hám qıytaq jer iyeleri keńesi hár sherektiń juwmaǵı boyınsha (keyingi aydıń 15-sánesine shekem) salıqtıń jeńilligi sıpatında jer salıǵı stavkasınıń páseytiwshi koefficientin (Prezidenttiń 29.12.2017-jıldaǵı PQ-3454-sanlı qararınıń 28-bánti) qollanıw boyınsha rayonnıń hákimine usınıs kirgizedi. Bunday usınıslar egislik jerlerinen maqsetli hám nátiyjeli paydalanıp, rayon hákiminiń boljaw kórsetkishleri haqqındaǵı qararında belgilengen egin túrlerin tolıq ekken, agrotexnika ilajların óz waqtında sapalı orınlaǵan, jılına keminde 2-3 márte joqarı ónim alǵan jáne de qıytaq jerdi abadanlastırǵan, sharwa malları hám tawıqlardıń bas sanın saqlaǵan hám kóbeytiwge erisken qıytaq jer iyesine qarata kirgiziledi.
Rayon hákimi keńes baslıǵı menen birge salıq jeńilligin qollaw boyınsha rayonlıq mámleketlik salıq inspekciyasına usınıs kirgizedi.
Eger monitoring nátiyjelerine bola boljaw kórsetkishlerinde belgilengen egin túrleri hám de dekorativ tekreklerdiń egilmegenligi, sharwa mallarınıń satıp alınbaǵanlıǵı, ıssıxana qurılmaǵanlıǵı, atap aytqanda, jer uchastkasınıń abadanlastırılmaǵanlıǵı anıqlansa, isshi topar tárepinen eskertiw xatı sol ornında tayarlanadı hám onıń bir nusqası tiyisli diyqan xojalıǵınıń baslıǵı yamasa qıytaq jer iyesine beriledi.
Bunda Prezidenttiń 10.10.2017-jılda PQ-3318-sanlı qararınıń talapları túsindirilip, kemshiliklerdi saplastırıw ushın bir háptelik múddet belgilenedi.
Kemshilikler bul múddet ishinde saplastırılmaǵan bolsa, topar 1 kúnlik múddette bul haqqında keńeske xabarnama kirgizedi, xabarnama eskertiw xatları menen birge rayon hákimliligine usınıladı.
Rayon hákimi keńestiń baslıǵı menen birge hár sherek boyınsha keyingi aydıń 15-sánesine shekem qıytaq jer uchastkalarınan tiykarsız túrde nátiyjesiz paydalanıw jaǵdayı boyınsha:
a) qıytaq jer iyesine usı jıl ushın esaplanǵan jer salıǵınıń 3 esesi muǵdarın qollanıwın sorap rayonlıq mámleketlik salıq inspekciyasına usınıs kirgizedi. Bunda qıytaq jer iyesine qarata jıl dawamında kóbi menen 1 márte usınıs kirgiziledi;
b)diyqan xojalıǵına qarata jer uchastkasına bolǵan huqıqtı nızam hújjetlerinde belgilengen tártipte biykar etiw boyınsha ilajlar kóriledi.
Hújjet 23.03.2018-jıldan kúshke kirdi.