Sońǵı waqıtları Tashkent kóshelerinde aynaları qaraytılǵan avtomobiller jiyi-jiyi kózge taslanbaqta. Bul jaǵdaydıń gúwası bolǵanlar “Qaraytılǵan aynalı avtomashinada háreketleniw múmkin boldı ma?” degen soraw payda bolmaqta, dep jazadı ÓzA.
JHQB xızmetkerleriniń ÓzA saytına bergen maǵlıwmatına bola, Ózbekstan Respublikası Hákimshilik juwapkershilik haqqındaǵı kodeksiniń 126-statyasında qaraytılǵan aynalı avtomobilde háreketleniw qadaǵan etiletuǵınlıǵı kórsetip ótilgen. Bul qaǵıydanı buzǵan transport basqarıwshısına járiyma sıpatında transport quralı waqıtsha irkiw járiyma maydanshasına evakuaciya etiledi. Qaǵıydanı buzıw eń kem miynet haqınıń 1 esesi muǵdarında jazalanadı. Eger bul jaǵday jáne bir márte qaytalansa, járiyma eń kem miynet haqınıń 2 esesi muǵdarında belgilenedi. Bul qaǵıyda Ózbekstan aymaǵında háreketlenetuǵın barlıq avtomobil iyelerine tiyisli esaplanadı.
Qońsılas mámleketten óz mashinasında kelgen sayaxatshılar da usı qaǵıydaǵa ámel etiwi shárt. Ózbekstan Respublikasınıń shegarasında mámleketke kirip kiyatırǵan sırt elli avtomashina iyesine bul qaǵıydalar birinshi gezekte eskertiw sıpatında aytıladı hám túsindiriledi. Eger qaǵıyda buzılǵan jaǵdayda transport basqarıwshısına tiyisli shara kóriledi.
Esletip ótemiz, Ózbekstan aymaǵındaǵı elshixanalarǵa tiyisli avtomashinalarǵa bul qaǵıyda tiykarında sheklew qoyılmaydı.
Qaraqalpaqstan xabar agentligi