Ellikqala rayonı aymaǵında jasawshı Altınay Saǵınbaeva (atı ózgertilip alındı) ózi qız bala bola tura bir neshe márte urlıq islep, huqıq qorǵaw uyımları tárepinen irkilgen bolsa da, bunnan tiyisli juwmaq shıǵarmastan úyrengen ádetin dawam ettire bergen. Sońǵı márte awıllaslarınıń bahalı zatların urlap baratırǵanında irkilip, onıń qarsısına jınayatli is qozǵatıldı. Bul is jınayat isleri boyınsha Ellikqala rayonlıq sudı tárepinen kórip shıǵılıp, Ózbekstan Respublikası Jınayat Kodeksiniń 169-statyası 3-bólimi «A» bánti menen ayıplı dep tabıldı.

Ol Ellikqala rayonlıq Hayal-qızlar komitetiniń kepillik xatı menen menen sud zalınan azat etilip, keleshekte huqıqbuzarlıqqa jol qoymaw, minez-qulqın jaqsılaw maqsetinde oǵan jasap kiyatırǵan máhálle puqaralar jıyınınıń diniy-aǵartıwshılıq hám ruwxıy-ádep-ikramlılıq máseleleri boyınsha másláhátshisi juwapker etip belgilendi.

Rayon hákiminiń orınbasarı, rayonlıq Hayal-qızlar komitetiniń baslıǵı onıń menen tikkeley shuǵıllanıwǵa kepillik berdi.

-Bunday ǵamqorlıǵı ushın rayonlıq Hayal-qızlar komiteti basshılarına sheksiz minnetdarshılıq bildiremen,-deydi Altınay Saǵınbaeva.-Keleshekte bunnan tiyisli juwmaq shıǵarıp, ómirden óz ornımdı tabıwǵa háreket etemen.

Esletip ótemiz, Ózbekistan Respublikası Prezidentiniń usı jıl 2-fevraldaǵı «Hayal-qızlardı qollap-quwatlaw hám shańaraq institutın bekkemlew tarawındaǵı jumısın túp-tiykarınan jetilistiriw ilajları haqqında»ǵı Pármanında hayal-qızlar arasında huqıqbuzarlıqlardıń erte aldın alıw, birinshi gezekte, huqıqbuzarlıqqa beyim bolǵanlar menen jeke tártipte jumıs alıp barıw jáne jazanı ótew mákemelerinen azat etilgen hayal-qızlardıń sociallıq reabilitaciyası hám beyimlesiwi boyınsha ilajlardı ámelge asırıwda mámleketlik uyımlar jáne puqaralıq jámiyeti institutları menen tıǵız birge islesiwdi támiyinlew Hayal-qızlar komitetleriniń tiykarǵı jumıs baǵdarınan biri etip belgilengen edi.

Qaraqalpaqstan xabar agentligi