Nókis qalası aymaǵında 128 gektar jer maydanına iye 12 qoyımshılıq bar.


Búgingi kúnde hár bir qoyımshılıqtıń kadastrlıq hújjetleri tiyisli tártipte islep shıǵılǵan bolıp, qoyımshılıqqa qayır-saqawatlardan kelip túsken aqshalar bankke tapsırılıp, olar ushın arnawlı esap beti ashılǵan.

Qoyımshılıqlardıń kirer jerinde puqaralar ushın zıyarat etiw tártipleri, qoyımshılıqtıń sxemalıq kartası kórsetilgen taxtalar ornatılǵan. Barlıq qoyımshılıqlar yuridikalıq mákeme, kárxanalardıń hám puqaralardıń ıqtiyarlı qayır-saqawatların dizimge alıw, qábir ústi esteliklerin hám jerlewdi esaptan ótkeriw kitapları menen támiyinlengen.

Qoyımshılıqlarda órt qáwipsizliginiń aldın alıw maqsetinde órt óshiriw shitleri, tazalıqtı saqlaw maqsetinde shıǵındı taslaw qutıları ornatılǵan.

Paytaxtımızda jaylasqan 12 qoyımshılıq Nókis qalalıq Abadanlastırıw basqarması balansına bekitilgen.

Basqarma tárepinen búgingi kúnde bir qansha jumıslar ámelge asırılmaqta.

Ótken jılı byudjet tárepinen qoyımshılıqlarǵa jámi 9 mln. . 638 mıń sum qarjı ajıratılıp, «Sálmen ata», «Shorsha», «Qusxana», «Oraz axun», «Ǵaniy ata», «Erqosay», «Shaǵır baba», «Sırǵalı sheyit», «Aqbaslı», «Xristian» qoyımshılıqları zıyarat etiw ornına ishki ońlaw jumısları islenip, gaz hám elektr tarmaǵı menen támiyinlenip, keshki jaqtılandırıw úskeneleri ornatıldı.

– «Sálmen ata» qoyımshılıǵınıń ulıwma jer maydanı 418100 kv.m bolıp, zıyarat etiw ornına ishki ońlaw jumısları júrgizildi. Zıyarat etiw ornı aldına bastırma qurdıq. 380 metr trotuar joldıń islenip, asfaltlanǵan jollar shetlerine bordyurlar qoyıldı. Jańadan dárwaza qoyılıp, gúmbez-maqbarası qayta qaplandı. Tilewxana tamı, qoyımshılıq átirapındaǵı qorǵan diywal tóbeleri shiferlandı, – deydi basqarmanıń qoyımshılıqlar bólimi jetekshisi Ańsatbay Mustafaev. Qoyımshılıq ishindegi, qábirler arasındaǵı jabayı shópler turaqlı túrde tazalanıp barılmaqta. Hár háptede jıynalǵan shıǵındılar arnawlı orınlarǵa mashinalar járdeminde alıp taslanadı. Basqarma tárepinen zıyaratshılar ushın qolaylıqlar jaratıw boyınsha kóklemzarlastırıw hám abadanlastırıw, tazalıq jumısları turaqlı túrde jumıslar alıp barılmaqta.


«Bir eldiń qanday ekenin bilmekshi bolsań, ol jerdiń bazarı menen mazarın kór», -degenindey qoyımshılıqlar taza hám abadanlastırıw jumısları jaqsı alıp barılsa ata-babalarımızdıń da ruwxları shad bolar edi.

Qaraqalpaqstan xabar agentligi