Usı jıldıń 17-mart kúni paytaxtımızdaǵı Jaslar orayında ótkerilgen Jaslar press klubınıń 4-sessiyasında Qaraqalpaqstan xabar agentliginiń sholıwshısı Islam Matekovtıń «Bıyılǵı jılı jaslar festivalı bola ma? Gala-koncert te bolıp ótiwi rejelestirilgen be?» degen sorawına Ózbekstan jaslar awqamı Qaraqalpaqstan Respublikalıq Keńesi baslıǵınıń orınbasarı B.Aralbaeva tómendegishe juwap berdi:
– Bıyılǵı jılı jaslar festivalı «Jaslar – keleshek qurıwshıları» súreni astında barlıq bilimlendiriw mákemelerinde, 3 baǵdarda – «Jas qosıq atqarıwshıları», «Jaslar muzıkalı ansamblleri hám orkestrleri» hám «Studentler teatr–studiyaları» baǵdarları boyınsha ótkeriledi. Biraq, ótken jıllardaǵı sıyaqlı paytaxtımızdıń oraylıq «Turan» stadionında festivaldıń gala-koncerti bolmaydı. Degen menen, joqarıdaǵı 3 baǵdar boyınsha festival qatnasıwshıları xalıq aldında koncert formasında óz qábiletlerin kórsetip beriwi kerek boladı, – dep aytıp ótti.
Esletip ótemiz, ótken jıldaǵı «Biz – ullı jurt perzentlerimiz!» uranı astında ótkerilgen jaslar festivalınıń gala-koncerti 19-may sánesinde «Turan» stadionında bolıp ótken edi.
Islam Matekov,
Qaraqalpaqstan xabar agentliginin sholıwshısı.