Qaraqalpaqstan Respublikası Ishki isler ministrligi Jol háreketi qáwipsizligi basqarması tárepinen «Avtomotoháweskerler» kewilliler jámiyetiniń respublikalıq keńesi menen birgelikte shólkemlestirilgen «Avtokárwan-2018» respublikamız boylap jolǵa shıqtı.
Qaraqalpaqstan Respublikası Ministrler Keńesiniń usı jıl 23-fevral kúngi biyligine muwapıq usı jıl 1-marttan 1-aprel aralıǵında respublikamızda ótkerilip atırǵan Háreket qáwipsizligi aylıǵı sheńberinde shólkemlestirilgen ilajdıń tiykarǵı maqseti, jol háreketi hádiyseleriniń aldın alıw, puqaralar arasında jol háreketi qádelerin keńnen úgit-násiyatlaw bolıp tabıladı. «Aydawshı, umıtpa, seni shańaraǵıń kútpekte!», «Sizsiz shańaraǵıńız baxıtsız!», «Nege bizdi taslap kettiń, ákejan!», «Aydawshı qolındaǵı telefon – qáwip-qáterge sebep!», «Jollarda balalardı saqlayıq!» sıyaqlı plakatlar menen bezetilgen avtomashinalar kárwanı qala hám rayonlardaǵı adamlar kóp jıynalatuǵın orınlarda bolıp, ilajdıń maqseti, respublikamız aymaǵında júz berip atırǵan jol-transport hádiyseleri, olardıń kelip shıǵıw sebepleri boyınsha túsinik jumısların alıp baradı.
«Avtokárwan-2018» ilajı respublikamız boylap dawam etpekte.
D.ABIBULLAEV
Qaraqalpaqstan xabar agentliginiń xabarshısı.