Qaraqalpaqstan Respublikası Densawlıqtı saqlaw ministrligi menen «Shegarasız shıpakerler» shólkeminiń tuberkulyozge qarsı gúresiw baǵdarında birge islesiwiniń 20 jıllıǵı múnásibeti menen paytaxtımızda «Velomarafon» sport jarısı ótkerildi.

Oǵan paytaxtımızda jaylasqan emlew hám profilaktikalıq mákemelerde jumıs isleytuǵın 80 nen aslam shıpaker hám miyirbiykeler qatnastı. Olar qalanıń arqa tárepindegi kishi aylanba joldan baslap, qala orayındaǵı Amfiteatrǵa shekemgi 20 kilometrden aslam joldı basıp ótti.

– Búgin mine ózińiz kórip turǵanıńızday, «24-mart – Dúnya júzilik tuberkulyozge qarsı gúresiw kúni» múnásibeti menen velomarafon shólkemlestirildi. Bunı ótkeriwden tiykarǵı maqset – keselliktiń aldın alıw, jámiyetshiliktiń usı kesellik hám onıń aqıbetleri boyınsha xabardarlıǵın arttırıw bolıp esaplanadı. Sebebi, bul kesellik elege shekem dúnya júzi xalıqları arasında úlken mashqalalardı keltirip shıǵarmaqta,-deydi «Shegarasız shıpakerler» shólkeminiń Qaraqalpaqstandaǵı «Tuberkulyozdi kompleksli emlew hámme ushın» joybarınıń koordinatorı Yashovar.

Jarıs juwmaǵında jeńimpazlar anıqlanıp, respublikalıq kóz kesellikleri emlewxanasınan M.Utewliev birinshi, M.Sırǵabaev ekinshi, Sh.Nurımbetov úshinshi orındı iyeledi.

Jeńimpazlar shólkemlestiriwshiler tárepinen tayarlanǵan diplom hám estelik sawǵaları menen sıylıqlandı.

Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev qatnastı hám shıǵıp sóyledi.

Qaraqalpaqstan xabar agentligi.