Elimiz boylap Nawrız seyilleri bolıp ótpekte

Elimizge báhár keldi. Ana jerimiz boylap báhár samalı ese basladı. Qaqaman suwıqta múlgip jatırǵan terekler oyanıp, búgin búrtik jarmaqta. Quyashtıń qaynaǵan ıssısın saǵınǵan shópler kózdi quwantıp, kókke boy sozdı. Názik shaqalarǵa gúl pitti, bir tegis gúllegen baǵlar gúbeklekler menen pal hárrelerdiń uyasına aylandı. Pútkil tirishilikte oyanıw, jańalanıw, jasarıw kórinisleri…

Elimiz bul saparı da tınısh hám tatıw, xalqımız saw-salamat hám turaqlı, salmaqlı tabısları, mol-molaqay ármanları, jaqsı tilekleri menen Nawrız tamashalarına qádem taslamaqta. Aspanımız ashıq. Bir dúnya ármanlar menen erteńin kútip, keleshekke isenimli túrde toy-tamashalar beriw, jańa jaylar salıw, Watannıń rawajlanıwına múnásip úles qosıw niyetinde jasap atırǵan xalqımız «Xosh keldińiz úlkemizge, Nawrız bayramı, qádemiń qutlı bolsın! Elimizdegi tınıshlıqqa hám tatıwlıqqa kóz tiymesin!» dep qutlı áyyyamdı kútip almaqta.

Xalqımız ázelden toy hám quwanıshlardı ayrıqsha tayarlıq penen qarsı aladı. Prezidentimiz Shavkat Mirziyoevtiń usı jıl 23-fevralda «2018-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında»ǵı qararı qabıl etilgen kúnnen baslap máhállelerde, qala hám awıllarda shembilikler, keń kólemdegi abadanlastırıw hám kóklemzarlastırıw jumısları shólkemlestirildi.

Nawrızdıń ruwxı hám filosofiyasında óz kórinisin tapqan miyrim-shápáát, doslıq hám tatıwlıq, jası úlken insanlardı, teberik ata-analardı hár tárepleme húrmetlew, járdemge mútáj insanlardıń awhalınan xabar alıwǵa baylanıslı qayırqomlıq ilajları ótkerildi.

…21-mart erte tańnan kernay-surnay hám dáplerdiń hawazı taralıp, elimizde Nawrız seyili baslanǵanınan dárek berdi.

Nawrız bayramı hámme jerde – Qaraqalpaqstan Respublikası hám wálayatlardıń oraylarında, qala, rayon, awıllarda ulıwmaxalıqlıq seyilleri túrinde ótkerilmekte.

Tashkent qalasındaǵı tiykarǵı bayram ilajları «Ózekspooray» kompleksinde bolıp ótti. Kernay-surnay hawazları xalıqtı seyilge shaqırdı.

Ózbekstan Respublikası Prezidenti Shavkat Mirziyoev bayram seyiline shıqtı.

…Hár qıylı bayraqshalar jelbireydi, ráńbáreń sharlar ólpeń samallarda terbeledi. Nawrız tamashaları bolıp ótetuǵın tiykarǵı saxna bayramǵa ılayıq bezelgen. Bul jerge húkimet aǵzaları, deputatlar hám senatorlar, ilim, mádeniyat, kórkem óner, sport ǵayratkerleri, óndiris aldınǵıları, isbilermenler, teberik ata-analar, hár qıylı tarawlarda bereketli miynet etip atırǵan watanlaslarımız, elimizde jumıs islep atırǵan shet mámleketlerdiń elshixanaları menen xalıqaralıq shólkemlerdiń wákilxanaları wákilleri kelgen.

Prezidentimiz dáslep bayram seyilinde qatnasıp atırǵan diplomatiyalıq korpus wákilleri, húrmetli miymanlar menen kórisip, olardı qutlıqladı.

…Ásirler dawamında Nawrız kúnleri xalqımız ǵalaba atız-dalalarǵa, kóshe hám qıyabanlarǵa, gúzar hám seyil etiw orınlarına seyilge shıqqan. Baqsılardıń aytısı, láparler, házil-dálkek, qosıqlar, xalıq termeleri, askiyashılardıń shıǵıwları jańlaǵan. Ílaq-kókpar, báygi, gúres, mergenlik sıyaqlı milliy oyınlar ótkerilgen. Dárwazlardıń, masqarapazlardıń, quwırshaq oynatatuǵınlarlıń, palwanlardıń tamashaları bolıp ótken.

Elimizde bıyılǵı Nawrız bayramı ózgeshe belgilenbekte. «Ózekspooray» kompleksinde keń seyil sıpatında ótken bayram baǵdarlamasında Qaraqalpaqstan Respublikası, wálayatlar hám Tashkent qalasınan kelgen wákiller óz aymaǵınıń tariyxı, mádeniyatı, úrp-ádet hám dástúrlerin sáwlelendirgen shıǵıwlar, tańsıq taǵamlar hám ónermentshilik ónimlerin kórsetti. Usta ónermentler, naǵıs oyıwshılar, kesteshi sheberlerdiń reńli lipasları, dombıra, dáp sıyaqlı xalıq saz ásbapları, milliy buyımlar hámmede úlken qızıǵıwshılıq oyattı.

Ráńbáreń qosıq hám ayaq oyın, hár qıylı kórkem óner jámáátleriniń shıǵıwları, shólkemlestirilip atırǵan xalıq oyınları, aytılıp atırǵan qosıq, lápar hám atqarılıp atırǵan oyınlarda áyyemgi bayramımızdıń hár túrli biybaha úlgileri óz kórinisin taptı.

Mámleketimiz basshısı hár bir aymaq ushın ajıratılǵan maydanǵa barıp, olardıń koncert baǵdarlamaların tamashaladı. Aymaqlardan kelgen nuranıy ata-analar menen sáwbetlesip, olardı bayram menen qutlıqladı. Qollar pátiyaǵa jayıldı.

…Jigitler shúllik, qasharman oynaydı, gúresip bellesedi. Baslarına gúl oramların taǵıp alǵan qızlar qaslarına osma súrtedi. Dárwazǵa qaraǵan adamnıń kózi qamasadı. «Bes tas», «Mak-mak» hám «Aq terek pe, kók terek!» oyınları, palwanlıq, gimnastika, akrobatika, masqarapazlıq, qızıqshılıq sıyaqlı tamashalar Nawrız seyili qatnasıwshıların quwanıshqa bóleydi. Úlken qazanlarda qaynaǵan súmelektiń iyisi álemge taraladı. Shashların maydalap órgen qızlar shadlı túrde ayaq oyınǵa túsedi. Analar tandırdan pisken nanlardı alıp, miymanlarǵa tarqatadı.

Láparler, qosıqlar, xalıq termeleri, askiyashılardıń aytısı qızadı. Folklor jámáátleriniń nama qosıqları quslardıń juǵırlısına, sulıw fontannıń sıldırlısına úylesip ketti.

…Xalqımız Nawrızdı ózgeshe bir saǵınısh, ıntıqlıq penen kútedi. Bul saparı da usınday quwanıshlı demlerde jer hám aspan qoynında júz berip atırǵan ózgerislerdi kewlinen ótkerip atırǵan jerleslerimizdiń kewillerinde quwanısh, áne usı jaqtı kúnlerge, gózzal turmıstıń biybaha jemislerine aman-esen jetkenimiz, aspanımızdıń ashıqlıǵı ushın shúkirshilik sezimleri lepirip turmaqta.

Elimiz boylap alıp barılıp atırǵan keń kólemdegi reformalardıń ruwxı adamlardıń kewline ótip, watanlaslarımız dóretiwshilikke, abatlıqqa qaray umtılmaqta. Ótken jılı 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasın «Xalıq penen pikirlesiw hám insan mápleri jılı»nda ámelge asırıwǵa baylanıslı Mámleketlik baǵdarlaması sheńberinde keń kólemli jumıslar ámelge asırıldı. Prezidentimiz Shavkat Mirziyoevtiń baslaması menen barlıq dárejedegi basshılar xalıqtıń ishine kirip, olardıń dárti hám táshwishleri menen qızıqsındı, mashqalalarǵa birgelikte sheshim tabıldı. «Insan mápleri hámme nárseden ullı» degen ideya hámmemiz ushın súrenge aynaldı.

Háreketler strategiyasınıń orınlanıwı sheńberinde 2017-jılı 20 dan aslam nızam hám 700 den zıyat nızamnan kelip shıǵatuǵın hújjetler qabıl etildi. Ózbekstan Respublikası Prezidentiniń Virtual qabıllawxanası, orınlarda Xalıq qabıllawxanaları shólkemlestirildi.

Ózbekstan Respublikası Prezidenti tárepinen birinshi márte elimizdiń parlamenti – Oliy Majliske Múrájat usınıldı.

Ótken jılı elimizde jasap atırǵan, lekin puqaralıǵı bolmaǵan 1100 den aslam shaxsqa Ózbekstan puqaralıǵı berildi.

Sonıń menen birge, elimiz tariyxında birinshi márte 2700 sudlanǵanlarǵa keshirim beriw haqqındaǵı Prezident pármanına qol qoyıldı. Bul da adamgershiliktiń joqarı úlgisi boldı.

Qısqa múddette 161 iri sanaat obekti iske túsrildi. Tashkent ıssılıq elektr stanciyasında puw-gaz qurılması qurıldı. Nawayı ıssılıq elektr stanciyasında ekinshi puw-gaz qurılması, Qızılqum qoynındaǵı Avminzo-Amantay altın kánleri negizinde gidrometallurgiya zavodın qurıw boyınsha jumıslar dawam etpekte. Qandım gazdi qayta islew kompleksi iske túsiriliwi esabınan 2018-jılı qosımsha túrde 4 milliard 100 million kub. metr tábiyǵıy gazdi qayta islew, 67 mıń tonnadan zıyat kondensat, 106 mıń tonnadan aslam altın kúkirt islep shıǵarıw imkaniyatı jaratıldı.

Almalıq kán-metallurgiya kombinatı «Yoshlik-1», «Yoshlik-2» kánlerin ózlestiriwge kiristi. Sardoba, Oraylıq Ferǵana hám Twpalang suw saqlaǵıshların qurıw boyınsha jumıslar jedel alıp barılmaqta. Ferǵana-Marǵılan jónelisindegi temir jol tarmaǵı házirgi waqıtta elektrlestirilmekte.

Ámelge asırılǵan ilajlar nátiyjesinde 2017-jılı ekonomikalıq ósim páti 5,5 procentti quradı, eksport kólemi derlik 15 procentke kóbeydi. Sırtqı sawda aylanısınıń unamlı saldosı 854 million dollarǵa jetti.

Milliy valyutanıń erkin konvertaciyası jolǵa qoyıldı. Yuridikalıq hám fizikalıq shaxslar shet el valyutasın kommerciyalıq banklerden sheklewsiz satıp alıw hám erkin satıw imkaniyatına iye boldı.

2017-jılı jańa sanaat kárxanaların qurıw, xızmet kórsetiw obektlerin iske túsiriw, kishi biznes hám jeke isbilermenlikti rawajlandırıw esabınan 336 mıńnan aslam jańa jumıs orınları jaratıldı.

Qala hám awıllarda jámi 3,5 million kvadrat metrden zıyat úlgi jaylar hám kóp qabatlı turaq jaylar qurıldı. Ol 2007-jılǵa salıstırǵanda 20 ese, úlgi turaq jaylar qurıw baǵdarlaması baslanǵan 2010-jılǵa salıstırǵanda 3,5 ese kóp turaq jay qurılǵanın kórsetedi.

25 jıl dawamında birinshi márte xalıq ushın arzan, barlıq qolaylılıqlarǵa iye kóp qabatlı turaq jaylardıń qurılısı baslandı. 2017-jıldıń ózinde 800 mıń kvadrat metrden aslam áne usınday turaq jaylar qurıldı. Bir ǵana Tashkent qalasınıń ózinde ótken jılı 420 mıń kvadrat metr kóp qabatlı turaq jay fondı paydalanıwǵa tapsırıldı.

Ruwxıy turmısımızda da áhmiyetli waqıyalar júz berdi. Prezidentimizdiń baslaması menen Ózbekstandaǵı Islam civilizaciyası orayı, imam Buxariy hám Imam Termiziy atlarındaǵı xalıqaralıq ilimiy-izertlew orayları, Islam akademiyası sıyaqlı ilimiy-aǵartıwshılıq mákemeleriniń jumısı jolǵa qoyıldı.

Xalıqaralıq birge islesiw boyınsha da elimiz tariyxında úlken ózgerisler júz berdi. Bir jıldıń ózinde 21 joqarı dárejedegi sapar etiw ámelge asırıldı, 60 tan aslam mámleket hám xalıqaralıq shólkemlerdiń basshıları jáne wákilleri menen ushırasıwlar ótkerildi. Nátiyjede 400 den aslam kelisimlerge erisildi, derlik 60 milliard AQSh dolları kólemindegi sawda hám investiciyalıq shártnamalarǵa qol qoyıldı.

2018-jılǵa elimizde Jedel isbilermenlikti, innovaciyalıq ideyalardı hám texnologiyalardı qollap-quwatlaw jılı, dep atama berildi. Bıyıl biznes-jumıstı innvoaciyalıq, yaǵnıy, zamanagóy kózqaraslar, aldınǵı texnologiya hám basqarıw usılları tiykarında shólkemlestiriwge ayrıqsha itibar qaratılmaqta.

Onda básekige shıdamlı ónim islep shıǵarıwǵa uqıplı, eń áhmiyetlisi, jańa jumıs orınların jaratıp, tek ǵana ózin hám shańaraǵın baǵatuǵın emes, al pútkil jámiyetke payda keltiretuǵın isbilermen insanlar hár tárepleme qollap-quwatlanadı.

…Nawrız elimizde jasap atırǵan, milleti, tili, dinine qaramastan, barlıq watanlaslarımız saǵınıp kútetuǵın ulıwma xalıqlıq bayram bolıp esaplanadı. Búgin elimizde 130 dan aslam millet hám xalıq wákilleri dos jáne tatıw jasamaqta. Olar ulıwma úyimiz – Ózbekstanımızdıń rawajlanıwı jolında barlıq tarawlarda pidákerlik penen miynet etpekte. Mámleketimiz basshısı saltanatqa qatnasqan hár qıylı millet hám xalıq wákilleri menen ushırasıp, olardı bayram menen qutlıqladı.

Ózbekstan Respublikası Prezidenti Shavkat Mirziyoev Nawrız bayramı – Shıǵıstıń jańa jılı menen pútkil Ózbekstan xalqın shın júrekten qutlıqladı.

Qutlı kúnde bárshege densawlıq, baxıt hám áwmet, shańaraqlarǵa tınıshlıq-qáterjamlıq, qut-bereket tiledi.

…Maydan boylap jańlap atırǵan jaǵımlı nama-qosıqlar elimizdiń uzaq-uzaq aymaqlarına taralıp, bayram quwanıshın Watanımız boylap keńnen en jaydırdı.

Usı kúni Ózbekstan Respublikası Prezidenti Shavkat Mirziyoev Samarqand qalasında ótkerilgen Nawrız tamashalarında da qatnastı.

Mámleketimiz basshısı dáslep qaladaǵı oraylıq dem alıw baǵında jaqında ornatılǵan Áliysher Nawayı hám Jomiy esteliklerine gúl qoydı. Usı jerde samarqandlı dóretiwshiler hám Nawrız tamashalarında qatnasıw ushın elimizge kelgen tájikstanlı shayır hám jazıwshılar menen sóylesiw waqtında ózbek hám tájik ádebiyatınıń bul eki ullı wákili húrmetine ornatılǵan estelik xalıqlarımız arasındaǵı ázeliy doslıqtı, jaqınlıqtı jáne de bekkemlewge xızmet etetuǵının atap ótti.

Samarqand qalasındaǵı Áliysher Nawayı atındaǵı oraylıq mádeniyat hám dem alıw baǵında shólkemlestirilgen bayram ilajlarında wálayat jámiyetshiligi, nuranıylar, óndiris belsendileri, jaslar menen sáwbetlesip, bársheni bayram menen jáne bir márte qutlıqladı. Shın júrekten sáwbetlesiw waqtında elimizdegi reformalar, adamlar turmısındaǵı ózgerisler tuwralı sóz etildi.

Abu Bakr WROZOV

ÓzA nıń xabarshısı