2018-jıl 15-mart kúni Oliy Majlis Nızamshılıq palatasınıń gezektegi májilisi bolıp ótti.
Májiliste deputatlar siyasiy partiyalardıń 2017-jıldaǵı jumısın qarjılandırıw derekleri haqqındaǵı esaapların tıńladı.
Atap ótilgenindey, elimiz Prezidenti Shavkat Mirziyoevtiń 2017-jıl 12-iyulde Oliy Majlistiń palataları, siyasiy partiyalar hám Ózbekstan Ekologiyalıq háreketiniń wákilleri menen bolıp ótken ushırasıwında belgilengen tiykarǵı wazıypalar tiykarında barlıq siyasiy partiyalar óz jumısın túp-tiykarınan kórip shıqtı hám bul jumıstı jańasha ámelge asırmaqta. Sebebi, eń áhmiyetli mámleketlik máselelerdi sheshiwde siyasiy partiyalardıń roli sezilerli dárejede kúsheytildi, orınlarda mashqalalardı úyreniw baǵdarındaǵı jumıslar jedellestirildi, partiyanıń elektoratın táshwishlendirip atırǵan áhmiyetli mashqalalardı ámeliy sheshiw jolların izlewge tiyisli jumıslar túp-tiykarınan qayta kórip shıǵıldı, orınlanıp atırǵan jumıslar sın kózqarastan talqılandı hám elimizdi jámiyetlik-siyasiy hám sociallıq-ekonomikalıq rawajlandırıwdıń turmıslıq áhmiyetli máselelerin belgilep beretuǵın alternativ nızam joybarların siyasiy partiyalar frakciyalarınıń aǵzaları tárepinen kirgiziwdiń processuallıq mexanizmlerin bunnan bılay da jetilistiriw ilajların ámelge asırıw baǵdarındaǵı jumıs kúsheytildi. Ulıwma qabıl etilgen demokratiyalıq standartlar menen xalıqaralıq normalarǵa sáykes bolǵan isenimli huqıqıy baza qayta kórip shıǵılıp hám tolıqtırıldı, qadaǵalanatuǵın ministrlikler hám vedomstvolar anıq belgilendi, endi siyasiy partiyalar tiyisli ministrlikler hám vedomstvolardıń jumısı ústinen nátiyjeli parlamentlik jáne deputatlıq qadaǵalawdı óziniń frakciyaları hám hákimiyattıń wákillikli uyımlarındaǵı óz toparları arqalı ámelge asıradı.
«Siyasiy partiyalardı qarjılandırıw haqqında»ǵı Nızamǵa tiykarlanıp siyasiy partiya Ózbekstan Respublikası Oliy Majlisi Nızamshılıq palatasındaǵı deputatlıq orınlarınıń sanına qaray óz ustav jumısın qarjılandırıw ushın mámleket tárepinen qarjılandırıw qarjıların alıw huqıqına iye.
Májiliste atap ótilgenindey, elimizdiń jámiyetlik-siyasiy turmısında siyasiy partiyalardıń roli kúsheytiliwi múnásibeti menen olardıń jumısında qarjılıq tártibi áhmiyetli bolıp esaplanadı. Házirgi sharayatta siyasiy partiyalardıń qaramaǵına Mámleketlik byudjetten kelip túsetuǵın qarjılardı nátiyjeli rejelestiriw hám jumsaw oǵada úlken áhmiyetke iye.
Siyasiy partiyalardıń shólkemlestiriwshilik-kadrlarǵa baylanıslı, materiallıq-qarjı hám basqa da resursları olardıń baǵdarlamalıq maqsetleri menen wazıypaların ámelde júzege shıǵarıwda úlken áhmiyetke iye, ol ushın usı qarjılardı jumsaw hám olarǵa tiyisli esaplar anıq jáne ashıq-aydın bolıwı tiyis ekenligi atap ótildi.
Frakciyalardıń aǵzaları atap ótkenindey, búgingi kúnde Ózbekstannıń barlıq siyasiy partiyalarında qadaǵalaw-tekseriw komissiyaları islep tur, olardıń jumısınıń shólkemlestiriwshilik-huqıqıy sharayatları, atap aytqanda, olardıń funkciyaları, wazıypaları jáne huqıqları hám minnetlemeleri anıq belgilengen.
Deputatlar tıńlaw dawamında bildirilgen pikirlerdi inabatqa alǵan halda siyasiy partiyalardıń 2017-jıldaǵı jumısın qarjılandırıw derekleri haqqındaǵı esapların maǵlıwmat ushın qabılladı.
Soń deputatlar «Tasıwshınıń puqaralıq juwapkershiligin májbúriy qamsızlandırıw haqqında»ǵı Ózbekstan Respublikası Nızamına ózgerisler hám qosımshalar kirgiziw haqqında»ǵı nızam joybarın birinshi oqıw sheńberinde dodalawǵa kiristi. Nızam joybarınıń maqseti tasıwshınıń puqaralıq juwapkershiligin májbúriy qamsızlandırıw mexanizmin jetilistiriw, barlıq jolawshılardıń máplerin qorǵaw, mámleketlik uyımlar tárepinen usı nızam orınlanıwı ústinen qadaǵalawdı jetilistiriw, sonday-aq, usı tarawdaǵı jumıslardıń nátiyjeliligin arttırıwdan ibarat.
Ótkerilgen qadaǵalaw-talqılaw baǵdarındaǵı úyreniwlerdiń juwmaǵına bola, 2018-jıldıń 1-yanvar halatına respublika boyınsha jolawshılardı tasıwshı licenziyalanǵan avtotransport quralları 74025ti quraydı. Licenziyalanǵan avtotransport qurallarınıń ulıwma sanınan tek ǵana 22010 ı, yaǵnıy 30 procenti qamsızlandırılǵan. Bul kórsetkish Nızam talaplarınıń tolıq orınlanbay atırǵanın kórsetpekte hám kóterilip atırǵan mashqalanıń áhmiyetliligin jáne bir márte tastıyıqlamaqta.
Kórip shıǵılıp atırǵan nızam joybarında jumısı licenziyalanıwı tiyis bolǵan, jolawshılardı hám olardıń múlkin tasıw boyınsha bizneske tiyisli transport xızmetlerin kórsetetuǵın yuridikalıq shaxslarǵa tasıwshınıń puqaralıq juwapkershiligin májbúriy qamsızlandırıw haqqındaǵı shártnamalardı úsh aydan bir jılǵa shekemgi múddetke dúziw huqıqı berilip atırǵanlıǵı, sonday-aq, jolawshılardı tasıw waqtında transport quralın basqarıp atırǵan hár bir aydawshınıń janında tiyisli transport quralı ushın rásmiylestirilgen qamsızlandırıw polisiniń bar bolıwı támiyinlenip atırǵanlıǵı názerde tutılmaqta.
Deputatalar gezektegi hújjet –«Shanxay birge islesiw shólkeminiń Ekstremizmge qarsı gúresiw Konvenciyasın ratifikaciyalaw haqqında»ǵı nızam joybarın birinshi oqıw sheńberinde kórip shıqtı.
Bul xalıqaralıq-huqıqıy hújjetti qabıllaw zárúrligi ShBShǵa aǵza mámleketler ushın qáwip tuwdırıp atırǵan dúnyadaǵı ekstremistlik kórinistegi hádiyseler kóleminiń hám ózgesheliginiń kúsheyip barıwı, ekstremizm ideologiyası, ásirese, terrorshılıqtıń tarqalıwı ushın da qolaylı ortalıq bolǵan diniy ekstremizm ideologiyası tásiriniń artıp barıwı menen baylanıslı ekenligi májilis dawamında atap ótildi.
Konvenciyaǵa suverenitetti qorǵaw haqqındaǵı normalar kirgizilgen, onda eksiremizmge qarsı gúresiwge baylanıslı mámlekettiń ishki ilajlarınıń shamalıq dizimi keltirilgen, onı qollanıw tarawı bekkemlengen, yurisdikciya shegaraları belgilengen, qanday qılmıslar jınayat dep atalıw kerekligi anıqlanǵan, huqıqıy járdem kórsetiw tiykarları hám tártibi sáwlelengen. Konvenciyada, sonday-aq, ShBShǵa aǵza mámleketlerden biriniń huqıq qorǵaw uyımları xızmetkerleriniń Shólkemge aǵza basqa mámleket aymaǵında ótkeriletuǵın operativ-izlew ilajları hám tergew háreketlerinde qatnasıwǵa tiyisli máseleler de óz kórinisin tapqan. Ekstremizm túsinigi buzǵınshı hádiyse sıpatında birinshi márte xalıqaralıq dárejede bekkemlep qoyıldı, onıń mazmunı hám ekstremistlik hárekettiń kriminallastırılıwı zárúr bolǵan tiykarǵı tiykarları belgilendi.
Konvenciya ShBShǵa aǵza mámleketlerdiń sergeklikke shaqırıwshı profilaktika jumısın, ekstremizmge qarsı birgelikte gúresiwdi, huqıqıy járdem kórsetiw tarawındaǵı birge islesiw mexanizmlerin qáliplestiredi hám Táreplerdiń nızamshılıǵın bir túrge engiziwge imkaniyat beredi.
Májiliste parlamenttiń Nızamshılıq palatasınıń wákilliklerine tiyisli basqa da máseleler dodalandı.
Ózbekstan Respublikası Oliy Majlisi
Nızamshılıq palatasınıń
Málimleme xızmeti