Ózbekstan Respublikası Prezidenti Shavkat Mirziyoev 27-mart kúni «Tınıshlıq procesi, qáwipsizlik tarawında birge islesiw hám regionallıq sheriklik» temasındaǵı Awǵanstan boyınsha joqarı dárejedegi Tashkent xalıqaralıq konferenciyası sheńberinde Evrokomissiya vice-prezidenti, Evropa Awqamınıń sırtqı isler hám qáwipsizlik siyasatı boyınsha Joqarı wákili Federika Mogerini, Rossiya Federaciyası sırtqı isler ministri Sergey Lavrov, Túrkiya Respublikası sırtqı isler ministri Mevlyut Chavushuǵli, Pakistan Islam Respublikası sırtqı isler ministri Xavaja Muhammad Asif penen ushırasıwlar ótkerdi.
Mámleketimiz basshısı Evropa awqamınıń sırtqı isler hám qáwipsizlik siyasatı boyınsha Joqarı wákili Federika Mogerinidi qabıl etip, túrli dárejedegi baylanıslardıń jedelleskenin tereń qanaatlanıwshılıq penen atap ótti, bul bolsa Ózbekstan hám EA arasındaǵı kóp qırlı birge islesiwdi rawajlandırıw hám bekkemlew jolındaǵı óz-ara umtılıstan dárek bolıp tabıladı.
Sáwbetlesiwde Awǵanstandaǵı jaǵdaydı tınısh jol menen sheshiwde zárúr járdem kórsetiw hám regiondı turaqlı rawajlandırıw, sonday-aq, sawda, investiciyalar, innovaciyalar, bilimlendiriw hám mádeniyat tarawlarındaǵı eki tárepleme ámeliy birge islesiwdi keńeytiw máseleleri boyınsha óz-ara baylanıslardıń perspektivaları kórip shıǵıldı. Kelesi jılı EAnıń Oraylıq Aziya boyınsha jańa Strategiyasın qabıl etiw zárúrligi atap ótildi.
Ózbekstan Prezidenti Rossiya Federaciyası sırtqı isler ministri Sergey Lavrov penen ushırasıwda Ózbekstan hám Rossiya arasındaǵı strategiyalıq sheriklik hám awqamlaslıq qatnasıqları joqarı pátlerde ósip hám bekkemlenip atırǵanın ayrıqsha atap ótti.
Sońǵı jıllardı eki tárepleme birge islesiw anıq ámeliy mazmun menen bayıǵanı atap ótildi. Óz-ara sawda kólemi artıp barmaqta, áhmiyetli investiciyalıq joybarlar ámelge asırılmaqta, biznes hám regionlar dárejesindegi kooperaciyalıq baylanıslar kúsheymekte. Bilimlendiriw, ilimiy-texnikalıq hám mádeniy-gumanitarlıq almasıwǵa baylanıslı jańa baǵdarlamalar ámelge asırılmaqta.
Rossiya Federaciyası Prezidentiniń usı jıldıń gúzinde Ózbekstan Respublikasına bolatuǵın mámleketlik saparına tayarlıq máseleleri kórip shıǵıldı.
Sonday-aq, xalıqaralıq hám regionallıq siyasattıń áhmiyetli máseleleri dodalandı.
Mámleketimiz basshısı Túrkiya Respublikası sırtqı isler ministri Mevlyut Chavushuǵlin shın júrekten qutlıqlap, doslıq hám strategiyalıq sheriklik qatnasıqların bunnan bılay da bekkemlew maqsetinde ótken jılı oktyabr ayında Túrkiyaǵa joqarı dárejedegi saparı waqtında erisilgen kelisimlerdi tolıq ámelge asırıw zárúrligin atap ótti.
Gezektegi joqarı dárejedegi ushırasıwlarǵa tayarlıq kóriw, bárinen burın, sóylesiwlerdiń kún tártibin sawda, investiciya, joqarı texnologiyalar, transport hám turizm, mádeniyat tarawları hám basqa da baǵdarlardaǵı óz-ara paydalı birge islesiwge baylanıslı anıq joybarlar hám baǵdarlamalar menen bayıtıw máselelerine ayrıqsha itibar qaratıldı.
Pakistan Islam Respublikası sırtqı isler ministri Xavaja Muhammad Asif penen ushırasıwda eki tárepleme qatnasıqlarǵa ámeliy ruwx baǵıshlaw zárúrligi tuwralı sóz boldı.
Mámleketimiz basshısı óz-ara sawda, awıl xojalıǵı mashina qurılısı, jeńil sanaat hám basqa da tarmaqlardaǵı kooperaciyalıq baylanıslar, transport kommunikaciyaların rawajlandırıw, Ózbekstanǵa zıyarat turizmi ushın kelip atırǵan turistlerdiń aǵımın kóbeytiw tarawlarında úlken potencial bar ekenin ayrıqsha atap ótti.
Sóylesiwlerdi bunnan bılay da jedellestiriw, túrli dárejedegi óz-ara sapar etiwler jáne qospa ilajlar shólkemlestiriw boyınsha kelisimge erisildi.
Ushırasıwlar waqtında shet el delegaciyalarınıń basshıları Awǵanstan boyınsha joqarı dárejedegi Tashkent konferenciyasın tolıq qollap-quwatlaytuǵının bildirip, ol óz waqtında shólkemlestirilgenin hám ilajdıń kún tártibine kirgizilgen máseleler ayrıqsha áhmiyetke iye ekenin atap ótti.
Forumnıń nátiyjeleri usı eldegi jaǵdaydı tınısh sóylesiwler jolı menen sheshiw procesin ámelge asırıwǵa salmaqlı úles qosatuǵınına isenim bildirdi.
Jańa basqıshta ámelge asırılıp atırǵan jámiyetlik-siyasiy jańalanıwlar hám sociallıq-ekonomikalıq reformalar, sonday-aq, Ózbekstannıń regionda konstruktivlik hám óz-ara paydalı birge islesiw boyınsha belsene qatnasqanına joqarı baha berildi.
Joqarı mártebeli miymanlar Prezidentimizge Evropa Awqamı basshılıǵı, Rossiya, Túrkiya hám Pakistan basshılarınıń jalınlı sálemin hám shın júrekten tileklerin jetkerip, óz elleriniń Ózbekstan Respublikası menen hár tárepleme birge islesiwin bunnan bılay da rawajlandırıwǵa tayar ekenin bildirdi.
ÓzA