Usı jıldıń 20-mart kúninen baslap Tashkent-Úrgenish hám Tashkent-Nókis-Qońırat jónelisindegi jolawshı poezdler jańadan qurılǵan Buxara-Miskin temir jol liniyası arqalı háreketleniwdi basladı.
Házirgi kúnge shekem Tashkent-Úrgenish poezdi 1027 km, Tashkent-Nókis-Qońırat poezdi 1327 kilometrlik joldı basıp ótip, «Nawayı-Úshqudıq-Miskin» magistralı arqalı háreketlengen bolsa, usı joybardıń qurıp pitkeriliwi menen poezdlerdiń qatnawı derlik 100 kilometrge qısqardı. Bul bolsa jolǵa ketetuǵın waqıttı, janar maydı hám basqa qárejetlerdi tejewge tiykar jaratadı.
Eń baslısı, Tashkent qalasınan Úrgenish, Xiywa, Nókis qalalarına baratuǵın hám usı jónelislerden Tashkent qalasına baratuǵın jolawshı poezdlarınıń háreketleniw waqtı derlik 2 saatqa qısqaradı.
Tashkent-Saratov, Tashkent-Volgograd, Almatı-Nókis, Ándijan-Úrgenish, Nókis-Úrgenish-Termiz poezdlarınıń da usı jańa liniya arqalı qatnawı jolǵa qoyıladı. Bul bolsa elimizde turizmdi rawajlandırıw, turistler aǵımınıń ele de artıwına tiykar boladı.
Bul temir joldıń ekinshi basqıshında elektrlestiriw jumısları ámelge asırılıp, usı jónelis arqalı elektropoezdlar hám joqarı tezlikte háreketlenetuǵın «Afrosiyob» zamanagóy poezdlar qatnawı da ámelge asırılıwı kózde tutılǵan.
Qaraqalpaqstan xabar agentligi