Statistikalıq maǵlıwmatlarǵa qaraǵanda, házirgi waqıtta Qaraqalpaqstan Respublikasında 20 dan aslam millet wákilleri awızbirshilikte, tınısh-tatıw jasap kelmekte.
Nawrız – xalıqlar doslıǵı bayramı. Elimizdegi ótkerilip atırǵan Nawrız seyillerinde hár bir millet wákilleri ózleriniń milliy úrp-ádetleri, dástúrleri, milliy kiyim hám taǵamları menen bayram seyilleriniń kóterińki ruwxta ótiwine úles qospaqta.
Házirgi waqıtta Qaraqalpaqstan Respublikasında 5 milliy mádeniy oray – qazaq, túrkmen, rus hám ukrain milliy mádeniy orayları hám koreecler associaciyası óz jumısın alıp barmaqta. Olar ózleriniń milliy-mádeniy estelikleri, bayramları, úrp-ádet hám dástúrlerin belgilewi ushın hesh qanday sheklewler joq.
Elimizde túrli millet wákilleriniń usınday awızbirshilikte, abadan turmısta jasap atırǵanı mámleketimizde demokratiyalıq principlerdiń qanshelli durıs jolǵa qoyılǵanlıǵınan hám xalqımızdıń bárqulla doslıq múnásibetlerdi qollap-quwatlaytuǵınlıǵınan dárek beredi.
Islam Matekov,
Qaraqalpaqstan xabar agentliginiń sholıwshısı.