Búgingi kúni elimiz basshıları tárepinen respublikamızdıń social-ekonomikalıq rawajlanıwına ayrıqsha itibar qaratılmaqta. Bunıń dáliyli sıpatında Prezidentimiz tárepinen qabıl etilgen «Qaraqalpaqstan Respublikasında kishi sanaat zonaların shólkemlestiriӯ ilajları haqqında»ǵı PQ-3588-sanlı qararın atap ótsek boladı.
Bunnan basqa, 2018-jıldıń – «Jedel isbilermenlikti, innovaciyalıq ideyalardı hám texnologiyalardı qollap-quwatlaw jılı» dep járiyalanıwı Qaraqalpaqstan Respublikasında isbilermenlikti rawajlandırıw, innovaciyalıq ideyalardı engiziw hám jańa texnologiyalar tiykarında jańadan investiciyalıq joybarlardı ámelge asırıwda ornı ayrıqsha bolmaqta.
– Usı qarar boyınsha aymaǵımızdaǵı 6 rayonda, yaǵnıy, Ámiӯdárya, Beruniy, Qońırat, Taqıyatas, Xojeli hám Shımbay rayonlarında kishi sanaat zonaların shólkemlestiriӯ belgilengen,-deydi Qaraqalpaqstan Respublikası Investiciyalar boyınsha komitetiniń baslıǵı K.Sadıkov.
Onda kishi sanaat zonaları aymaǵındaǵı kóshpes mámleketlik múlkin ijara dáwirinde paydalanıw ushın ijara tóleminiń «nol» stavkası belgilengen.
Ózbekstan Respublikası Tikleniw hám rawajlanıw fondına kishi sanaat zonalarında ámelge asırılatuǵın investiciya joybarlarına qarjılandırıw ushın 75 million AQSh dolları muǵdarında kredit liniyaların kommerciyalıq bankler arqalı belgilengen tártipte ashıw tapsırılǵan.
Sanaat tarawında jańa shólkemlestiriletuǵın mikrofirmalar hám kishi kárxanalar, sonıń ishinde Moynaq, Shomanay, Qanlıkól, Taxtakópir, Shımbay rayonlarında shólkemlestirilgenleri 2027-jıldıń 1-yanvarına shekem, al basqa rayonlarda – 2022-jıldıń 1-yanvarına shekem birden-bir salıq tólemin tólewden azat etiledi.
Sonday-aq, kishi sanaat zonalarında injener-kommunikaciya hámde islep shıǵarıw infrastrukturasın qayta tiklew jumısların orınlaw ushın Ózbekstan Respublikası Mámleketlik byudjetinen qarjı ajıratıw belgilengen.
Bul jańadan shólkemlistirilip atırǵan kishi sanaat zonaları, álbette, jaqın arada social-ekonomikalıq rawajlanıwımızǵa óziniń úlken unamlı tásirin kórsetedi. Atap aytqanda, sanaat ónimlerin islep shıǵarıwdı arttırıw, eksportqa mólsherlengen hám import ornın basatuǵın ónimlerdi islep shıǵarıw, jańa jumıs orınların jaratıw ushın úlken imkaniyatlar ashılmaqta.
Á.Jiemuratov,
Qaraqalpaqstan xabar agentliginiń xabarshısı.