Búgingi kúni respublikamızda 2018-2019-jıllarda bılǵarı ayaq kiyimi ónimlerin islep shıǵarıwǵa qánigelestirilgen zamanagóy jańa kárxanalardı shólkemlestiriw, islep turǵanlarınıń quwatlılıǵın arttırıw, modernizaciyalaw boyınsha jańa joybarlardıń ámelge asırılıwı rejege muwapıq nátiyjeli dawam etpekte.

– Atap aytqanda, «Orient Texnology» kárxanasınıń baslaması menen quwatlılıǵı 15 million kvadrat dm.lik, bahası 5 million 250 mıń AQSh dolları muǵdarındaǵı tayar teri islep shıǵarıwshı «Orient Tovro» kárxanasın iske túsiriw rejelestirilmekte. Nátiyjede 50 jańa jumıs ornı jaratıladı. Bul joybar usı jıldıń tórtinshi shereginde iske túsiriliwi kútilmekte,-deydi Qaraqalpaqstan Respublikası «Nukuscharmpoyabzal» JShJ bas direktorı S.Babataev.

– Búgingi kúnde usı kárxananıń ásbap-úskeneler ornatılatuǵın maydanlarında qurılıs jumısları alıp barılmaqta. Ásbap-úskenelerdiń birinshi partiyası Italiya mámleketinen alıp kelinbekte.

Jańadan shólkemlestirilip atırǵan«Orient Tovro» kárxanasında jáne jılına 300 mıń jup ayaq kiyim islep shıǵarıwǵa mólsherlengen, bahası 3 million AQSh dolları muǵdarındaǵı joybar da iske túsiw aldında. Joybar iske tússe 120 jańa jumıs orınları payda boladı. Joybar endigi jılı iske túsiriledi.

Búgingi kúnde usı zamanagóy kárxananıń qala qurılısı hám arxitekturalıq talaplar tiykarında jaylasıwı boyınsha jumıslar ámelge asırılmaqta. Sonday-aq, Italiya texnologiyası tiykarında ásbap-úskeneler alıp kelip ornatıw boyınsha shet elli sherikler menen shártnamalarǵa qol qoyısıw baǵdarındaǵı sóylesiwler alıp barılmaqta.

Sonday-aq, búgingi kúnde islep turǵan Ellikqala rayonındaǵı «Bostan teri ayaq kiyimi» JShJ in usı jıldıń 3-sheregine shekem keńeytiwdi názerde tutatuǵın joybar boyınsha da jumıslar baslap jiberildi. Bul joybarǵa jámi 50 mıń AQSh dolları muǵdarındaǵı qarjı jumsalatuǵın bolsa, sonnan kárxananıń óz esabınan 12 mıń dollar jumsalıwı kútilmekte. Joybar iske tússe rayon turǵınları ushın taǵı 20 jańa jumıs orınları jaratıladı.

Usı baǵdardaǵı ilajlardıń respublikamızdıń basqa da orınlarında baslanıwı kútilmekte.

Á.Jiemuratov,

Qaraqalpaqstan xabar agentliginiń xabarshısı.