USD 10500.03
EUR 12607.39
RUB 140.7

Juma, 29 Mart

Sayt test rejiminde islep tur. Qolaysızlıqlar ushın keshirim soraymız.

QARAQALPAQSTAN RESPUBLIKASÍ JOQARǴÍ KEŃESINIŃ SESSIYaSÍ HAQQÍNDA MÁLIMLEME

Usı jıl 16-mart kúni Qaraqalpaqstan Respublikası Joqarǵı Keńesiniń jigirmalanshı sessiyası bolıp ótti.

Sessiyanıń jumısına Ózbekstan Respublikası Oliy Majlisi Senatınıń, Qaraqalpaqstan Respublikası Húkimetiniń aǵzaları, tiyisli kárxana, mákeme, huqıq qorǵaw uyımlarınıń basshıları, ǵalaba xabar qurallarınıń wákilleri qatnastı.

Sessiyanı Qaraqalpaqstan Respublikası Joqarǵı Keńesiniń Baslıǵı M.Erniyazov basqarıp bardı.

Eń dáslep, deputatlar sessiyanıń Sekretariatın sayladı hám kún tártibin tastıyıqladı.

Atap ótilgenindey, húrmetli Prezidentimizdiń basshılıǵında elimiz ekonomikasınıń barlıq tarawlarında úlken ózgerisler menen jańalanıwlar júz bermekte. Ásirese, Prezidentimizdiń ótken jılı 15-16-dekabr kúnleri respublikamızǵa saparı dawamında belgilep berilgen wazıypalar keń kólemli dóretiwshilik jumıslarǵa bekkem tiykar salmaqta.

Atap ótetuǵın bolsaq, bıyılǵı jıldıń ózinde 4 yarım trillion sumǵa shamalas qarjı esabınan 313 iri joybardı ámelge asırıw jumısları baslap jiberildi. Sonıń ishinde, Nókis qalasında kir juwıw mashinaların islep shıǵaratuǵın bahası 8,3 milliard sumlıq, Taqıyatas rayonında «Nawayı kán-metallurgiya kombinatı» tárepinen joybar bahası 1 million AQSh dollarlıq metall-konstrukciyalar hám úskeneler islep shıǵarıw zavodın qurıw boyınsha joybarlardı iske túsiriw, sonday-aq, «Almalıq kán-metallurgiya kombinatı» tárepinen bahası 44,5 milliard sumlıq temir-beton jáne inert materialların islep shıǵaratuǵın, Shımbay rayonında bahası 10 million AQSh dolları muǵdarındaǵı toqımashılıq kárxanasın, Qaraózek rayonında bahası 17 milliard sumlıq sharwashılıq kompleksin, Taxtakópir rayonında 12 milliard sumǵa shamalas gósh ónimlerin qayta islew joybarın iske túsiriw, Tórtkúl rayonında 2,6 milliard kub sıyımlılıqtaǵı bahası 1 trillion 677 milliard sumlıq suw saqlaǵıshın qurıw joybarınıń esap-sanaǵı islep shıǵılıp, ekspertizadan ótkeriw jumısları alıp barılmaqta. Eń baslısı, xalqımızdıń abadan turmısın támiyinlew, ekonomikamızdı bunnan bılay da bekkemlewge baylanıslı bunday iygilikli islerdi barlıq qala hám rayonlarımızdıń mısalınan kóriwimizge boladı.

Bizge belgili bolǵanınday, mektepke shekemgi bilimlendiriw tarawın rawajlandırıw, mámleketlik emes balalar baqshaları tarmaǵın keńeytiw búgingi kúnniń áhmiyetli máselelerinen biri esaplanadı. Usı másele boyınsha Prezidentimizdiń Pármanı hám 4 qararı qabıl etildi.

Jurtbasshımız respublikamızǵa saparı waqtında Shımbay rayonındaǵı 8-sanlı balalar baqshasında bolıp, taraw jumısların jaqsılaw boyınsha wazıypalar belgilep berdi. Sonday-aq, usı jıl 14-fevral kúngi mektepke shekemgi bilimlendiriw sistemasın reformalaw hám rawajlandırıw boyınsha kórilip atırǵan ilajlardıń nátiyjeliligin talqılawǵa baǵıshlanǵan videoselektor májilisinde balalar baqshalarınıń qurılıs-ońlaw jumıslarınıń sapasın jaqsılaw, olardıń materiallıq-texnikalıq bazasın bekkemlew, kerekli azıq-awqat ónimleri menen támiyinlew, tálim-tárbiya jumısların jaqsılaw boyınsha tájiriybeli pedagog hám arnawlı qánigeler menen támiyinlew máselesine ayrıqsha toqtap ótti.

Búgingi kúni 3 jastan 7 jasqa shekemgi balalardıń 34,8 procenti ǵana baqshalarǵa qamtıp alınǵan. Bul kórsetkishti arttırıw maqsetinde bıyılǵı jıldıń ózinde mámleketlik rawajlandırıw Baǵdarlaması tiykarında 6 baqshada jańa qurılıs, 27 baqshanı rekonstrukciyalaw, 18 baqshada iri ońlaw jumısların alıp barıw rejelestirilgen. Sonday-aq, mámleketlik-jeke menshik sheriklik tiykarında 179 balalar baqshasın jańadan shólkemlestiriw belgilengen. Bul baqshalardı iske túsiriw arqalı qosımsha 14 mıńnan aslam balanı qamtıp alıw imkaniyatı jaratılıp, baqshalarǵa tartılǵan balalardıń sanı 34,8 procentten 47,2 procentke jetedi. Al, 2021-jılǵa barıp balalardı qamtıp alıw kórsetkishin 95-100 procentke jetkeriw názerde tutılmaqta.

Mektepke shekemgi bilimlendiriw sistemasın reformalaw hám rawajlandırıw baǵdarında alıp barılıp atırǵan jumıslardıń barısı haqqında Qaraqalpaqstan Respublikası Ministrler Keńesi Baslıǵınıń orınbasarı M.Jumanov bayanat jasadı.

Bul másele boyınsha Qaraqalpaqstan Respublikası Mektepke shekemgi bilimlendiriw ministri J.Usnatdinova, Qaraqalpaqstan Respublikası Arxitextura hám qurılıs komitetiniń baslıǵı J.Embergenovlar shıǵıp sóyledi.

Deputatlar mektepke shekemgi bilimlendiriw tarawın rawajlandırıw baǵdarında islep shıǵılǵan «Jol kartası» boyınsha tiyisli qarar qabıl etti.

Bunnan soń Bántlik hám miynet qatnasıqları ministrligi tárepinen puqaralardıń miynet huqıqların támiyinlew baǵdarında alıp barılıp atırǵan jumıslar haqqındaǵı málimlemesi tuwralı másele kórip shıǵıldı. Bul boyınsha Qaraqalpaqstan Respublikası Bántlik hám miynet qatnasıqları ministri U.Saburov bayanat jasadı.

Sessiyada respublikamızdı 2017-jılda sociallıq-ekonomikalıq jaqtan rawajlandırıwdıń juwmaqları hám bıyılǵı jılǵa belgilep berilgen eń áhmiyetli wazıypalar haqqındaǵı másele boyınsha Qaraqalpaqstan Respublikası Ministrler Keńesi Baslıǵınıń birinshi orınbasarı A.Tajetdinov bayanat jasadı. Deputatlar tárepinen tiyisli qarar qabıl etildi.

Kún tártibinde, sonday-aq, Ózbekistan Respublikası Oraylıq banki Qaraqalpaqstan Respublikası Bas basqarması tárepinen 2017-jılda ámelge asırılǵan jumıslar haqqındaǵı másele kórip shıǵıldı. Bul boyınsha Oraylıq banktiń Qaraqalpaqstan Respublikası Bas basqarmasınıń baslıǵı B.Allaniyazov bayanat jasadı hám tiyisli qarar qabıl etildi.

Sessiyada deputatlar Ekologiya hám qorshaǵan ortalıqtı qorǵaw komiteti tárepinen ótken jılı islengen jumıslar haqqındaǵı máseleni kórip shıqtı. Bul másele boyınsha Qaraqalpaqstan Respublikası Ekologiya hám qorshaǵan ortalıqtı qorǵaw komitetiniń baslıǵı T.Xojanazarov bayanat jasadı. Bul boyınsha qarar qabıl etildi.

Deputatlar Qaraqalpaqstan Respublikası Joqarǵı Keńesi Prezidiumınıń sessiyalar aralıǵında qabıl etken qararların tastıyıqladı.

Usınıń menen Qaraqalpaqstan Respublikası Joqarǵı Keńesiniń jigirmalanshı sessiyası óz jumısın juwmaqladı.

D.ABIBULLAEV,

Qaraqalpaqstan xabar agentliginiń xabarshısı.