Ózbekstan XDP Qaraqalpaqstan Respublikalıq hám Nókis qalalıq Keńesleri tárepinen ulıwmaxalıqlıq Nawrız bayramı múnásibeti menen «Bárháma itibarımızdasız!» akciyası ótkerilmekte.
Atap ótilgenindey, xalqımızdıń eski hám áyyemgi qádiriyatların, onıń ullı arzıw-umtılısların ózinde jámlegen, ata-babamızdan bizge biybaha miyras bolıp kiyatırǵan Nawrız ǵárezsizlik jıllarında jańasha mazmun menen bayıdı. Nátiyjede ulıstıń ullı kúni elimizde jasap hám miynet etip atırǵan milleti, tili, dinge isenimine qaramastan, barlıq Watanlaslarımız ushın arzıw-úmit penen kútetuǵın, shın mánisindegi ulıwmaxalıqlıq bayramǵa aylandı, desek asıra aytqan bolmaymız.
Shıǵıs jańa jılınıń baslanıwı, tábiyattıń oyanıwınıń simvolı, túp-tiykarında milliy, eń ardaqlı bayram esaplanǵan Nawrızdıń jurtımızda miyrim-shápáát, jámleskenlik, insanıylıq, keńpeyillik hám dóretiwshilik, qayır-saqawat ortalıǵın bunnan bılay da bekkemlew, jas áwladtı milliy dástúrlerimizge sadıqlıq, ulıwmainsanıy qádiriyatlarǵa húrmet ruwxında tárbiyalawdaǵı ornı jáne tásiriniń barǵan sayın artıp baratırǵanın esapqa alǵan halda hám bul áyyyamdı kóterińkilik ruwxında belgilew maqsetinde Ózbekstan Respublikası Prezidentiniń usı jıl 28-fevralda «2018-jıldıń ulıwmaxalıqlıq Nawrız bayramına tayarlıq kóriw hám onı ótkeriw haqqında»ǵı qararı qabıl etildi. Usı qararǵa muwapıq bıyılǵı jılǵı bayram «Áziyz Watanlaslar, hár kúnińiz Nawrız bolsın!» súreni astında ótpekte.
-Bayram múnásibeti menen Ózbekstan XDP Qaraqalpaqstan Respublikalıq Keńesi Atqarıw komitetiniń qararı tiykarında qabıl etilgen ilajlar baǵdarlamasındaǵı «Bárháma itibarımızdasız!» akciyası sheńberinde paytaxtımızdaǵı 2-sanlı «Hawa jolı», 41-sanlı «Aq jaǵıs» mákan puqaralar jıyını aymaqlarındaǵı 10 sociallıq járdemge mútáj shańaraqtan, mayıplıǵı bolǵan shaxslardıń hal-jaǵdayınan xabar alındı,- deydi Ózbekstan XDP Nókis qalalıq Keńesiniń baslıǵı Nurlan Kıshanov.-Olardı bayram menen qutlıqlap, sawǵalar tapsırıldı.
Bunnan tısqarı, bayram kúnlerinde Ózbekstan XDP qalalıq hám rayonlıq Keńesleri tárepinen «Hár bir insan ushın múnásip bayram» akciyası sheńberinde xalıq seyilleri, «Nawrız-jańalanıw hám jaqsılıq tımsalı» súreni astında jaslar arasında sport jarısları ótkerilmekte.
D.ABIBULLAEV
Qaraqalpaqstan xabar agentliginiń xabarshısı.