Xojeli rayonı ishki isler bólimi xızmetkerleri tárepinen ótkerilgen ilaj dawamında Turan kóshesi 1-jayda jasawshı huqıqbuzıwshı Uzaqbergen Pirjanov óz úyinde diniy «Hujra» shólkemlestirip, «Yexova gúwaları» nızamsız diniy shólkem aǵzaların jıynap, arnawlı diniy maǵlıwmatqa iye bolmastan diniy tálim berip kelgenligi anıqlandı. Bul haqqında «Erkin Qaraqalpaqstan» gazetası xabar berdi.
Sonday–aq, diniy mazmundaǵı materiallardı nızamǵa qılap ráwishte tarqatıw maqsetinde saqlap kelgenligi, huqıqbuzıwshılar Nuriya Eshimbetova, Rano Pirjanova, Aysha Allaxanova, Baltamurat Doshmuratov hám Altınay Uzaqbaevalar nızamsız diniy iskerlik penen shuǵıllanıp, diniy máresimge baylanıslı bolmaǵan toparlardı shólkemlestirip otırǵanlıǵı, al huqıqbuzıwshılar Bazargúl Allaxanova hám Bibimaryam Nurıllaevalardıń diniy mazmundaǵı materiallardı nızamsız tarqatıw maqsetin gózlep saqlap kelgenligi anıqlandı.
Waqıya ornında ayǵaqlı zat retinde huqıqbuzıwshı B.Allaxanovaǵa tiyisli bolǵan «Explay» markalı planshet, B.Nurıllaevaǵa tiyisli A3100 «Nextbook» markalı planshet, ADATA fleshkası hám 16 betten irabat diniy mazmundaǵı tarqatpa materiallar, U.Pirjanovqa tiyisli «ASUS» markalı noutbuk hám «Samsung» qol telefonı hám R.Pirjanovanıń «Samsung» G5 52-82 markalı qol telefonları qalıs gúwalardıń qatnasında hújjetlestirip alınıp, tiyisli orınlarǵa tapsırıldı.
Ózbekstan Respublikası Ministrler Kabineti janındaǵı Din isleri boyınsha komitetiniń bergen juwmaǵına júginer bolsaq, is boyınsha tekserilgen materiallardıń elimiz aymaǵına alıp keliniwi, tarqatılıwı hám paydalanılıwı qadaǵan etilgen materiallar ekenligi tastıyıqlanǵan.
Anıqlanǵan aǵım aǵzalarınıń huqıqbuzarlıq háreketleri sud uyımı tárepinen nızam sheńberinde kórip shıǵılıp, eń kem aylıq is haqınıń kimine on, ayrımlarına on bes esesi muǵdarında járiyma jazası tayınlandı.
Qaraqalpaqstan xabar agentligi