Paytaxtımızda jańadan qurılǵan Olimpiada hám milliy sport túrlerine qánigelestirilgen joqarı sport sheberlik mektebinde 10-15-mart kúnleri aralıǵında respublikamızda birinshi mártebe sporttıń qılıshlasıw túri boyınsha «Qaraqalpaq qılıshı» atamasında Ózbekstan ashıq turniri ótkerildi.
Oǵan respublikamızdaǵı Tashkent, Ándijan, Samarqand, Ferǵana, Xorezm, Buxara, Jizzaq wálayatlarınan 2003-jılı tuwılǵan hám onnan kishi jastaǵı 200ge jaqın sportshılar qatnastı.
Sportshılar qılıshlasıwdıń sablya, shpaga hám rapira jónelisleri boyınsha, jekke hám komanda bolıp óz-ara kúsh sınastı.
Er balalar arasında ótkerilgen sablya jónelisi boyınsha bellesiwde komandalıq esapta Nókis olimpiada rezervleri kolledji birinshi, Qaraqalpaqstan saylandı 1-komandası ekinshi, Qaraqalpaqstan saylandı 2-komandası úshinshi orındı iyeledi.
Usı jónelis boyınsha qızlar arasındaǵı jarısta komandalıq esapta Jizzaq wálayatınıń sportshıları jeńimpaz dep tabıldı.
Rapira hám shpaga jólelisleri boyınsha komandalıq esapta birinshilik Ándijan wálayatı sportshılarına nesiyp etti.
Jeńimpazlar shólkemlestiriwshiler tárepinen tayarlanǵan diplom hám estelik sawǵaları menen sıylıqlandı.
Tárbiya SEYTNAZAROVA,
Qaraqalpaqstan xabar agentligi xabarshısı