«Haywanlardı identifikaciyalaw, olardı esapqa alıw, esaptan shıǵarıw hám saqlaw tártipleri haqqında»ǵı Húkimet qararına muwapıq, 2020-jılǵa shekem puqaralarǵa tiyisli barlıq úy haywanları dizimge alınadı.

– Maqset – fermer xojalıqlarındaǵı, járdemshi xojalıqlardaǵı hám xalıqtıń menshik úy haywanların esapqa alıw hám esaptan shıǵarıwdı tártipke salıwdan ibarat,-deydi Qaraqalpaqstan Republikası veterinariya komitetiniń haywanlardıń densawlıǵın saqlaw bóliminiń qánigesi G.Berdimuratov.- Bunda haywanlarǵa sırǵa, tamǵa, chip, jetonlar basılıp, olarǵa veterinariya pasportları beriledi. Hár bir haywan tiyisli kodlar menen belgilenedi. Máselen, qara mallar-1, koy-eshkiler-2, túyeler-3, iytler-8 bolıp kodlanadı.

Úy haywanların dizimge alıw, shıǵarıw jumısları 2018-2020-jıllarda basqıshpa-basqısh ámelge asırıladı.

Eger úy haywanlarınıń iyeleri basqa jerge kóshse, sol jerdegi jergilikli veterinariya xızmeti tárepinen qaytadan esaptan ótkeriledi.

Qararǵa muwapıq haywan iyelerinen malların identifikaciyalaw ushın tólem óndiriledi. Tólem muǵdarları Qarjı ministrligi menen kelisilgen halda veterinariya komiteti táripinen belgilenedi.

Házirgi waqıtta Ministrler Kabinetiniń usı qararı boyınsha rayonlarda veterinariya qánigeleri tárepinen haywanlardı identifikaciyalaw boyınsha túsindiriw jumısları alıp barılmaqta.

Qaraqalpaqstan xabar agentligi