Ózbekistan Respublikası Prezidenti Shavkat Mirziyoev ótken jıldıń 14-15-dekabr kúnleri respublikamızǵa saparı waqtında barlıq tarawlar sıyaqlı qusshılıqtı rawajlandırıw boyınsha anıq kórsetpeler bergen edi Belgilengen wazıypalardıń orınlanıwın támiyinlew sheńberinde 2018-2019 jıllarda respublikamızdaǵı tawıqlardıń bas sanın, onnan alınatuǵın ónimlerdi kóbeytiw baǵdarında 34 joybardı ámelge asırıw boyınsha anıq reje islep shıǵıldı. Jeti ǵáziyneniń biri esaplanǵan qusshılıq tarawında Ellikqaladaǵı Mammatsharip Qurbanov basshılıq etip kiyatırǵan «Nurummat Qurbanov» fermer xojalıǵınıń aǵzaları tek rayonda emes, al respublikamızda aytarlıqtay tabıslardı qolǵa kirgizip kelmekte. Sonlıqtan olardıń is tájiriybesi respublikamızda keń en jaydırılıp kelinbekte.

2009-jılı shólkemlestirilgen xojalıqta búgingi kúni 34,5 mıńnan zıyat tawıq kútimli baǵılmaqta. Sonıń esabınan 20 adam, kópshiligi kásip-óner kolledjlerin pitkergen jaslar turaqlı jumıs penen támiyinlengen. Fermer xojalıǵında hár jılı 600 mıń bas shóje, 4,2-4,5 million dana máyek, 60 tonna tawıq góshi jetistiriledi. Usınıń nátiyjesinde sońǵı úsh jıllıqtaǵı ulıwma dáramadı 4,5 milliard sumdı, sap payda bolsa 235 million sumdı quraǵan. Sonnan hár jılı 10 million sumdı qáwenderlik islerine sarıplap kelmekte. Jumısshılarǵa hám járdemge mútáj shańaraqlarǵa 4 mıń bas shóje, 20 mıń dana máyek tarqatıp berildi.

Xojalıqta 6 gektar maydandaǵı biydaydan, 9 gektardaǵı mákkeden, 3 gektar maydandaǵı jońıshqadan, 7,4 gektardaǵı ayǵabaǵardan hám basqa da dánli eginlerden joqarı zúráát alınıp, sonıń esabınan jem tayarlanbaqta.

Xojalıq esabında jámi 7 túrli markadaǵı texnika bolıp, hár jılı alınǵan dáramat esabınan jańaları satıp alınbaqta. Atap aytqanda, sońǵı jılları bir dana MX1,8 PTM, eki dana MTZ-80, bir dana ISUZU, bir dana GAZ-53 júk avtomashinası, eki dana tirkeme hám basqa da awıl xojalıǵı texnikaları menen agregatları satıp alındı.

-Elimizde qusshılıqtı rawajlandırıwǵa qaratılıp atırǵan itibar hám imkaniyattan paydalanǵan halda jaqın kúnlerde saatına altı tonna jem islep shıǵarıw quwatına iye cextı iske túsiriw rejelestirip atırmız,-deydi fermer xojalıǵınıń baslıǵı Mammatsharip Qurbanov.-«Ózsanaatqurılısbank» ten 170 mıń AQSh muǵdarında kredit alıp, Túrkiya mámleketinen zamanagóy úskeneler alıp kelip ornatıladı. Jańa cex iske túskennen keyin tek ózimiz ǵana emes, al, respublikamızdaǵı qusshılıq hám balıqshılıqqa qánigelestirilgen fermer xojalıqları da shártnama tiykarında jem menen támiyinlenedi. Sonıń menen birge, bes jańa jumıs ornı jaratıladı.

Istiń kózin bilsek, qaysı bir taraw bolsa da paydalı. Bunı qusshılıq tarawında jıldan-jılǵa joqarı nátiyjelerge erisip kiyatırǵan «Nurummat Qurbanov» fermer xojalıǵınıń mısalınan ayqın kóriwimizge boladı.

D.ABIBULLAEV

Qaraqalpaqstan xabar agentliginiń xabarshısı