2018-jıldıń «Jedel isbilermenlikti, innovaciyalıq ideyalardı hám texnologiyalardı qollap-quwatlaw jılı» dep belgileniwi múnásibeti menen isbilermenlik subektleriniń jumıslarında ushırasıp atırǵan mashqalalardı anıqlaw, olardı múmkinshiligi bolǵanınsha orınlarda sheshiw hám sol arqalı jańa jumıs orınların jaratıw maqsetinde Qaraqalpaqstan Respublikası Ministrler Keńesi Qaraqalpaqstan Respublikası Prokuraturasınıń baslaması menen respublikamızdıń barlıq qala hám rayonlarında ushırasıwlar ótkerildi.
Paytaxtımızdaǵı Jaslar orayında Qaraqalpaqstan Respublikası prokurorı Rashid Raxmatovtıń isbilermenlik subektleri menen usı máselelerge baǵıshlanǵan gezektegi ushırasıwı bolıp ótti.
Oǵan Qaraqalpaqstan Respublikası Ministrler Keńesi, Qaraqalpaqstan Respublikası Prokuraturası, Mámleketlik salıq basqarması, Bajıxana basqarması, Oraylıq banktiń Qaraqalpaqstan Respublikalıq basqarması, elektr, gaz, suw mákemeleriniń, qaladaǵı 4 sektordıń basshıları hám qaladaǵı barlıq mákeme hám shólkemlerdiń qánigeleri, isbilermenlik subektleri qatnastı.
Májiliste Qaraqalpaqstan Respublikası prokurorı R.Raxmatov hám basqalar shıǵıp sóylep, isbilermenlik subektleriniń máplerin qorǵawǵa arnalǵan Ózbekstan Respublikası Prezidentiniń párman hám qararlarınıń mazmun-mánisi tuwralı keńnen túsindirip ótti.
Atap ótilgenindey, qalada jámi 7579 isbilermenlik subektleri jumıs islep atırǵan bolsa, usı jıldıń ózinde 509 isbilermenlik subektleri shólkemlestirilgen. Házirgi waqıtta 5605 isbilermenlik subektleri hár qıylı tarawlarda jumıs islemekte. 2017-jıl dawamında 3894 isbilermenlik subektine kommerciyalıq bankler tárepinen 395 milliard 107 million sumnan aslam kredit qarjıları ajıratılǵan. Usı jılı olarǵa 450 milliard sumnan aslam kredit qarjıları ajıratılıwı kútilmekte. Nátiyjede 3000 nan aslam jańa jumıs orınları jaratıladı.
Soń, májiliste qatnasıp atırǵan isbilermenlik subektleriniń hám puqaralardıń jumıslarındaǵı mashqalaları hám usınısları tıńlanıp, pikir-usınıslar bildirildi.
Májiliste kórilgen máseleler boyınsha tiyisli qarar qabıl etildi.
Qaraqalpaqstan xabar agentligi.