Qaraqalpaqstan Respublikası Ministrler Keńesiniń usı jıl 23-fevral kúngi biyligine muwapıq 1-marttan 1-aprel aralıǵında respublikamızda Háreket qáwipsizligi aylıǵı ilajı ótkerilmekte.

-Onı shólkemleskenlik penen ótkeriw boyınsha operativ shtab dúzilip, ilajlar belgilendi,-deydi Ámiwdárya rayonlıq ishki isler bólimi Jol háreketi qáwipsizligi bólimshesiniń baslıǵı Ixtiyar Sherimbetov.-Ilaj sheńberinde akademiyalıq liceyde, ekonomika kásip-óner kolledjinde, 55-sanlı ulıwma bilim beriw mektebinde jol háreketi qaǵıydaların saqlaw, júz berip atırǵan hádiyseler, onıń kelip shıǵıw sebepleri hám ayanıshlı aqıbetlerine baǵıshlanǵan ushırasıwlar ótkerildi. Ilaj barısında oqıwshılarǵa jol háreketi qaǵıydaları boyınsha keń túrde túsinik berildi.

Atap ótilgenindey, alıp barılıp atırǵan úgit-násiyat jumıslarına qaramastan, rayon aymaǵında jol-transport hádiyseleri azaymay atır. Bıyılǵı jıldıń dáslepki eki ayında jámi 1383 qaǵıyda buzıw jaǵdayı anıqlanıp, bul ótken jıldıń usı dáwirine salıstırǵanda 871 hádiysege kóp boldı. Sonıń ishinde, transport quralların más halında basqarǵan 61, jol háreketi qaǵıydaların turpayı túrde buzǵan 554 aydawshı irkilip, tiyisli shara kórildi.

Háreket qáwipsizligi aylıǵı ilajı baslanǵanlı beri 194 hákimshilik bayanlama rásmiylestirilip, sonnan transport quralın más halında basqarıp kiyatırǵan 9, belgilengen háreket tezligin asırǵan 17, quwıp ótiw qaǵıydasın buzǵan 36, adam tasıw qaǵıydasın buzǵan 44, svetofordıń qadaǵan etilgen shıraǵınan ótken 5 aydawshı irkilgen bolsa, 19 transport quralı járiyma maydanshasına qoyıldı.

Atap aytqanda, usı jıl 1-mart kúni rayonlıq ishki isler bólimi Jol háreketi qáwipsizligi bólimshesiniń aǵa inspektorı, serjant G.Eshanov tárepinen «VAZ-2106» markalı, mámleketlik belgisi 95 M803DA avtomashinası irkilip tekserilgende, onıń aydawshısı 1987-jılı tuwılǵan puqara J.Dáwletbaev, usı jıl 3-mart kúni Jol patrul xızmeti inspektorı Q.Qarajanov tárepinen Neksiya markalı, mámleketlik belgisi 95 F481 FA bolǵan avtomashina irkilgende, onıń awdawshısı, 1992 tuwılǵan Sh.Baltabaev más halında ekenligi anıqlandı. Bul eki aydawshıǵa inspektorlar tárepinen hákimshilik bayanlamalar dúzildi.

Avtotransport quralların más halında basqarıw, belgilengen tezlikti asırıw, jol háreketi belgilerine boysınbaw qanday aqıbetlerge alıp keletuǵınlıǵı xalqımız, ásirese, jaslarımız arasında keń túrde túsindirilip atırǵanlıǵına qaramastan, ayırım puqaralar bunnan tiyisli juwmaq shıǵarmay atır. Usı jıldıń basında rayon aymaǵında júz bergen eki awır aqıbetli jol transport hádiysesi nátiyjesinde 7 adam nabıt bolıp, 6 adam túrli dárejedegi dene jaraqatın alǵan.

Rayon aymaǵında Háreket qáwipsizligi aylıǵı ilajı dawam etpekte.

D.ABIBULLAEV

Qaraqalpaqstan xabar agentliginiń xabarshısı