Tashkent qalasındaǵı Ya.X.Turakulov atındaǵı respublikalıq qánigelestirilgen endokrinologiya ilimiy-ámeliy medicina orayınıń direktorı, professor Anvar Alimovtıń basshılıǵındaǵı bir topar shıpakerler respublikamızǵa keldi. Olar usı jıl 13-15-mart kúnleri aralıǵında Respublikalıq endokrinologiya dispanserinde qala hám rayonlardan kelgen nawqaslardı medicinalıq tekseriwden ótkerip, Respublikalıq kóp tarmaqlı medicina orayında master-klass shólkemlestiredi hám nawqaslarǵa operaciya islemekte.
– Bizler hár kúni buǵaq bezindegi nawqaslıǵı hám diabetlik tobıq diagnozı bar 50 den aslam nawqastı medicinalıq tekseriwden ótkerip atırmız. Búgin birinshi kúngi tekseriw payıtında tańlap alınǵan eki nawqasqa operaciya isledik. Buǵan qosımsha jergilikli shıpakerler menen birge orınlarda master-klass ótkerip atırmız.
Bul ilajlardı ótkeriwdegi tiykarǵı maqsetimiz – shetki hám uzaq awıllarda jasaytuǵın usı kesellikler menen nawqaslanǵanlarǵa ámeliy jerdem kórsetiw. Kem támiyinlengen shańaraqlardaǵı nawqaslar qıyın operaciyalardı Tashkent qalasına barıp otırmay-aq, usı jerdiń ózinde ótkeriw múmkinshiligine iye boladı,-deydi Ya.X.Turakulov atındaǵı respublikalıq qánigelestirilgen endokrinologiya ilimiy-ámeliy medicina orayı Xirurgiya bóliminiń baslıǵı, medicina ilimleriniń kandidatı N.Alimjanov.
Sonday-aq, juwapker xızmetkerler menen birgelikte qantlı diabet, onıń klinikalıq kórinisi, profilaktikası, aldın alıw ilajları boyınsha sáwbetlesiwler, ushırasıwlar shólkemlestirilip, tájiriybe almaspaqta. Usı medicinalıq mákemelerdiń materiallıq-texnikalıq bazasın ele de bekkemlew baǵdarında sóylesiwler júrgizilmekte.
Ilajlar dawam etpekte.
Á.Jiemuratov,
Qaraqalpaqstan xabar agentliginiń xabarshısı