Qaraqalpaqstan Respublikası Ishki isler ministrligi Baspasóz xızmetiniń maǵlıwmatlarına qaraǵanda, Qanlıkól rayonı aymaǵınan ótetuǵın «Ǵuzar-Buxara-Nókis-Beynew» asfalt jolında jol háreketi hádiysesi júz bergen. Rayondaǵı «Assalam» kafesi aldınan Qońırat rayonı tárepke baǵdarlanǵan puqara I.Shtıń basqarıwındaǵı tirkemeli «Volvo» markalı júk avtomashinası joldı kesip ótip atırǵan úsh puqaranı qaǵıp aldı.

Aqıbetinde, eki puqara waqıya júz bergen jerde qaytıs boldı. Dene jaraqatın alǵan jáne bir puqara emlewxanaǵa jatqarıldı.

Bul jaǵday boyınsha Qaraqalpaqstan Respublikası IIM janındaǵı Tergew basqarması tárepinen jınayat isi qozǵatılıp, házirgi waqıtta tergew háreketleri alıp barılmaqta.

Sonday-aq, usı jıl 1-mart kúni túngi saat 03:30 ler shamasında Úrgensh qalası puqarası ózine tiyisli «Lada Largus» markalı transport quralın Qońırat rayonı aymaǵınan ótetuǵın «Ǵuzar-Buxara-Nókis-Beynew» asfalt jolında basqarıp baratırıp, usı jol shetinde toqtap turǵan «KAMAZ» markalı avtomashinası tirkemesiniń artqı tárepine urǵan. Júz bergen jol háreketi hádiysesi aqıbetinde «Lada Largus» markalı avtomoshinasındaǵı úsh puqara waqıya bolǵan jerde qaytıs bolǵan.

Bul jaǵday boyınsha da Qaraqalpaqstan Respublikası IIM janındaǵı Tergew basqarması tárepinen jınayat isi qozǵatılıp, házirgi waqıtta tergew háreketleri alıp barılmaqta.

Bunday jaǵdaylar jol háreketi qaǵıydalarınıń buzılıwı menen tikkeley baylanıslı bolıp, adamlardıń ómirden biymezgil kóz jumıwına sebep bolmaqta. Bárqulla háreket qaǵıydalarına boysınıp, saq júriw hár qanday kewilsiz jaǵdaylardıń aldın alıwı sózsiz.

Qaraqalpaqstan xabar agentligi