Húrmetli Nursultan Abishevich!

Húrmetli mámleketler hám delegaciyalar basshıları!

Xanımlar hám mırzalar!

Bárinen burın, búgin qutlı hám saqawatlı Qazaqstan jerinde ózimizdi óz úyimizdegidey, arzıw-niyet hám umtılısları birdey bolǵan birden-bir tatıw shańaraq aǵzalarınday sezip atırǵanımızdı ayrıqsha atap ótpekshimen.

Qazaqstan Respublikası Prezidenti, tuwısqanım hám dostım, húrmetli Nursultan Abishevich Nazarbaevqa Qazaqstan Respublikasında Ózbekstan Respublikası jılın ótkeriw haqqındaǵı baslaması hám qararı ushın tereń minnetdarshılıq bildirmekshimen.

Kóp jıllıq nátiyjeli birge islesiwimiz tariyxında birinshi márte ótip atırǵan bul áhmiyetli waqıya xalıqlarımız arasındaǵı haqıyqıy tuwısqanlıq qatnasıqlarınıń ayqın kórinisi bolıp tabıladı.

Jaratqannıń ózi bizge qońsı bolıwday biybaha jemisti inam etken. Biziń danıshpan ata-babalarımız «Háwli alma, qońsı al», dep biykarǵa aytpaǵan. Biz ázel-ázelden bir jer ústinde, bir aspan astında jasap kelmektemiz, biziń tamırlarımız bir.

Xalıqlarımızdıń Ábu Rayxan Beruniy hám Ábu Nasr Farabiy, Xoja Axmed Yassawiy hám Bahouaddin Naqshband, Áliysher Nawayı hám Abay Qunanbaev, Aybek hám Muxtar Áwezov, Ǵafur Ǵulam hám Sabit Muxanov sıyaqlı ullı ǵayratkerleri hám basqa da kóplegen ataqlı ilimpazlar, oyshıl hám shayırlardıń miyrası biziń ortaq baylıǵımız bolıp tabıladı.

Biz adamgershilik hám jaqsılıq ideyaları menen suwǵarılǵan bul ruwxıy miyrastı qásterlep saqlawımız hám bayıtıwımız lazım.

Áne, usı kózqarastan qaraǵanda, sońǵı waqıtta siyasiy erk-ıqrarımız hám óz-ara umtılıslarımızdıń nátiyjesinde doslıq, jaqın qońsıshılıq hám strategiyalıq sheriklik baylanısların bekkemlew jolında birge islesiwdiń barlıq baǵdarları boyınsha haqıyqatında da úlken nátiyjelerge eristik.

Aymaqlarımız arasındaǵı jaqın baylanıslar, adamlardıń óz-ara ashıq-aydın sóylesiwi hám doslıǵı, mádeniy baylanıslardıń jedelleskeni iygilikli maqset – xalıqlarımızdı bunnan bılay da jaqınlastırıwǵa xızmet etpekte.

Bul jetiskenliklerge xalıqaralıq kólemdegi iri mámleketlik hám siyasiy ǵayratker, Qazaqstan Respublikası Prezidenti húrmetli Nursultan Abishevich Nazarbaevtıń úlken háreketleri nátiyjesinde erisilgenin ayrıqsha atap ótpekshimen.

Bárshemizge jaqsı belgili, Oraylıq Aziya elleriniń regionımızdıń tınıshlıǵı, turaqlılıǵı hám rawajlanıwı, búgingi hám keleshek áwladlardıń abadanlıǵı jolında óz-ara integraciyalasıwınıń inta kórsetiwshisi de áyne húrmetli aqsaqalımız Nursultan Abishevich bolıp tabıladı.

Onıń dana basshılıǵında ámelge asırılıp atırǵan izbe-iz siyasiy ózgerisler hám ekonomikalıq reformalar, uzaqtı gózlep, tereń oylap alǵa qoyılǵan globallıq hám regionallıq kólemdegi baslamalar pútkil dúnyada tán alınıp atırǵanı bárshemizdi quwandıradı.

Qazaqstannıń birlesken Birlesken Milletler Shólkemi Qáwipsizlik Keńesindegi tabıslı basshılıǵı, siziń elińizde bolıp ótken Shanxay birge islesiw shólkemine aǵza mámleketler basshıları keńesiniń tariyxıy májilisi, EKSPO-2017 pútkil jáhán kórgizbesiniń joqarı dárejede shólkemlestirilgeni, Islam birge islesiw shólkeminiń Ilim hám texnologiyalar boyınsha birinshi sammiti hám basqa da kóplegen iri xalıqaralıq ilajlar Qazaqstannıń joqarı xalıqaralıq abıroyınan ayqın dárek beredi.

Búgin Astana qalasında uzaq jıllar dawamında birinshi márte Oraylıq Aziya mámleketleri basshılarınıń másláhát ushırasıwın ótkerdik.

Bulardıń barlıǵı, tek ǵana Qazaqstannıń úlken potencialına emes, al pútkil Oraylıq Aziya regionı elleri menen birge islesiw baǵdarındaǵı keń imkaniyatlarǵa dúnya jámiyetshiliginiń itibarın qaratıwǵa xızmet etetuǵınına gúman joq.

Húremtli doslar!

Biz ushın Qazaqstan zamanlar hám turmıs sınaǵınan ótken, kóp ásirlik doslıq hám tuwısqanlıq baylanısları menen tıǵız baylanısqan jaqın qońsımız bolıp tabıladı.

Bul tuwralı sóz eter ekenbiz, ullı Abaydıń tómendegi sózlerin eske alamız:

Hey insan, ar-namıs joldasıń bolsın,

Babalar hikmeti qoldasıń bolsın.

Mal-dúnya, abıroy – bárshesi biykar,

Xanalas sadıq dostıń, joldasıń bolsın.

Bul danalıq sózler tek ǵana búgingi saltanatlı máresimniń emes, al ellerimiz hám xalıqlarımız arasındaǵı qatnasıqlardıń súrenine aylanatuǵınına bekkem isenemen.

Usı múnásibet penen kúni keshe qazaq xalqınıń ullı perzenti, shayırı hám oyshılı, gumanisti Abay Qunanbaevtıń dóretiwshilik miyrasın keńnen úyreniw hám úgit-násiyatlaw haqqında Ózbekstan Prezidentiniń qararı qabıl etilgenin málim etpekshimen. Ol ullı insannıń biybaha úgit-násiyatları búgin de óziniń áhmiyetin hám qunın joyıtqanı joq.

Qarlıǵashbiy sıpatında da belgili bolǵan ullı Tólebiydiń mavzoleyi Tashkentte jaylasqanı, bul mákan ózbekler ushın da, qazaq doslarımız ushın da muqaddes zıyarat etiw ornı ekeni menen biz maqtanamız.

Húrmetli Nursultan Abishevich, ótken jılı Ózbekstanǵa mámleketlik saparıńız dawamında birgelikte, áne, usı teberik jerdi zıyarat etip, xalıqlarımızdı tınısh-tatıw hám awızbirshilikli jasawǵa shaqıratuǵın bul ullı shaxstıń esteligine húrmet kórsetkenimizdi jaqsı esleymen.

Barǵan sayın bekkemlenip atırǵan shın júrekten qatnasıqlarımızdan ullı babalarımızdıń ruwxları shad boladı, dep oylayman.

Haqıyqatında da xalıqlarımız bir-birine hámiyshe tayanısh hám súyenish bolıp kelgen.

Tariyxımızdıń uqsaslıǵı hám óz-ara jaqınlıǵımız házirgi dúnyanıń qıyın mashqalaların birgelikte sheshiw, biz ushın ulıwma qáwip-qáterlerge qarsı nátiyjeli gúresiw, jańa áwladlar ushın keleshekti birge qurıwǵa járdem bermekte.

Biz – qazaqlar, qırǵızlar, túrkmenler, tájikler hám ózbekler, gózzal Oraylıq Aziyada jasap atırǵan barlıq millet hám xalıq wákilleri menen birgelikte tınısh-tatıw, dos-awızbirshilikli bolıp jasawımız táǵdirdiń ózi tárepinen belgilep berilgen.

Sonlıqtan da biz ulıwma úyimizdi, perzentlerimizdi túrli kelispewshiliklerden hám qarama-qarsılıqlardan qorǵawǵa, regionımızda tınıshlıq hám paraxatshılıq húkim súriwin támiyinlewge bar kúsh-imkaniyatlarımızdı jumsawımız zárúr.

Áziz doslar!

«Astana opera» sarayınıń usı shıraylı zalında Ózbekstan kórkem óner sheberleri tárepinen kórsetiletuǵın búgingi koncert xalıqlarımızdıń óz-ara jaqınlıǵına, mádeniyatımız, dástúr hám úrp-ádetlerimiz uqsas ekenligine jáne bir ayqın mısal bolıp tabıladı.

Ózbekstannıń talantlı kórkem óner sheberleri tárepinen atqarılatuǵın nama-qosıqlar, olardıń sizler menen ushırasıwdan alatuǵın quwanıshları menen shadlıqları Qazaqstanda Ózbekstan jılın ótkeriw boyınsha rejelestirilgen birgeliktegi barlıq ilajlarǵa ayrıqsha ruwx hám keypiyat baǵıshlaydı.

Bul ilajlardıń tabıslı ótkeriliwi mámleketlerimiz arasındaǵı jaqın qońsıshılıq hám strategiyalıq sheriklik qatnasıqların bunnan bılay da bekkemlewge xızmet etetuǵınına isenemen.

Qádirli doslar!

Shın júrekten qabıllaǵanıńız hám miymandoslıǵıńız ushın sizlerge jáne bir márte minnetdarshılıq bildiriw maǵan úlken qanaatlanıwshılıq baǵıshlaydı.

Pursattan paydalanıp, sizlerdi hám sizler arqalı regionımızdıń barlıq tuwısqan xalıqların kirip kiyatırǵan gózzal báhár bayramı – Nawrız áyyyamı menen shın júrekten qutlıqlayman.

Itibarıńız ushın raxmet.