Astana qalasında 15-mart kúni Oraylıq Aziya mámleketleri basshılarınıń birinshi másláhátlesiw ushırasıwı bolıp ótti. Bul haqqında Prezidenttiń baspasóz xızmeti málim etti.
Oǵan Ózbekstan Respublikası Prezidenti Shavkat Mirziyoev, Qazaqstan Respublikası Prezidenti Nursultan Nazarbaev, Qırǵızstan Respublikası Prezidenti Sooronbay Jeenbekov, Tájikstan Respublikası Prezidenti Emomali Rahmon hám Túrkmenstan Mejlisi basshısı Akja Nurberdieva qatnastı.
Bunday ushırasıwdı turaqlı túrde ótkeriw hám regionallıq mashqalalarımızdı birgelikte sheshiw Ózbekstan Prezidenti Shavkat Mirziyoevtiń baslaması, dedi Qazaqstan Prezidenti Nursultan Nazarbaev. Jıynalısımız hámmemiz ushın ulıwmalıq bolǵan Nawrız qarsańında ótip atırǵanı da tereń mánige iye. Álbette, óz aldına ushırasıp turatuǵın edik, biraq bunday birgeliktegi ushırasıw kópten berli bolmaǵan edi.
Shavkat Mirziyoev Prezident lawazımına kirisiw aldında qońsılas mámleketler menen jaqınnan birge islesiwge ayrıqsha áhmiyet qaratıwın atap ótken edi. Ótken qısqa waqıtta barlıq aytqanların ámelge asırdı. Prezidentimiz mámleketlik sapar menen barlıq qońsı mámleketlerde boldı. Mámleketlik shegaralar, sawda baylanısları, transport kommunikaciyaları, aymaqlar menen birge islesiw sıyaqlı kóplegen máseleler boyınsha óz ara máplerge tiykarlanǵan sheshimler tabıwǵa erisildi.
Elimiz basshısı 2017-jıl sentyabrde BMSh Bas Assambleyasınıń 72-sessiyasında Oraylıq Aziya regionında tınıshlıq hám qáwipsizlikti bekkemlew, turaqlı sociallıq-ekonomikalıq rawajlanıwdı támiyinlewge qaratılǵan konstruktivlik ideya jáne baslamalardı alǵa súrdi. Bul baslamalar noyabrde Samarqandta bolıp ótken “Oraylıq Aziya: birden-bir tariyx hám ulıwmalıq keleshek, turaqlı rawajlanıw hám rawajlanıw jolındaǵı birge islesiw” temasındaǵı xalıqaralıq konferenciyada bir pútin baǵdarlama sıpatında usınıldı.
Oraylıq Aziya mámleket basshılarınıń másláhátlesiw ushırasıwı usılayınsha shólkemlestirildi.
Ushırasıwda Prezident Shavkat Mirziyoev usı kúni kóp ásirlik jaqsı qońsıshılıq tariyxında jańa bet ashılǵanın atap ótti.
Ózbekstannıń qońsılas mámleketler menen birge islesiwi izbe-iz rawajlanıp barmaqta, dedi elimiz basshısı. Elimizdiń Qazaqstan, Qırǵızstan, Tájikstan hám Túrkmenstan menen tovar almasıw kólemi 20 procentten arttı. Sonıń menen birge, xalıqlarımızdıń abadan turmısı jolında paydalanıwımız múmkin bolǵan kóplegen imkaniyatlar bar.
Qaraqalpaqstan xabar agentligi